Lcho tepsetba ken o nung nisung ana taküm piyong puoka ayutsü

Kohima, Luroi/August 23 (TYO): Kohima nung Lower Court kati aiür chanu ka taküm raksatsüba ken o nung aibelener ka küm 16 tepoukdak ayutsü aser nisung tepseter ana taküm piyong tepoukdak ayutsü atema obendang agutsü, ta tanü Court osang ka ajanga metetdaktsü.
2015 küm Kohima kübok Kitsubozou colony nung arishi küm 12 tetsür chanu ka taküm raksatsüba ken o nung Luroi/August 16 nü obendang agutsüba dak sendakba nung osangbenertem den jembidang Special Public Prosecutor, Kathu Rengma-i, Principal District & Session Court, Kohima nung Special Judge, Khesheli Chishi-i tai tonglokja alisang arishi küm 53, Khwushopra, küm 16 tepoukdak ayutsü obendang agutsü, ta metetdaktsü.
2015 küm Luchii/December ita nung aiür chanu ka taküm raksatsüba ken o nung 2016 küm Luroi/August ita nungang lar tsüraburtemi FIR ka benokba sülen Investigating Officer, UBSI Levinuo Nyuwi leniba nung police-i tai tonglokja alisangji apu, ta pai ashi.
Iba ken o akaba mapang nung kuli alir 10 ken o angadangba sülen Court-i tai tonglokja alisangji aitsü; temerenshi obendang nungji Protection of Children from Sexual Offences (POCSO) Act 2012 kübok küm 14 tepoukdak ayutsü aser Section 506 IPC kübok ano küm 2 talila tepoukdak ayutsü densema lir.
Ano külen taküm Tsüklai/February ita nung court-i obendang ka agutsüba dak sendakba nung Kathu Rengma-i, Principal District & Session Court, Kohima, Judge Y Maongkaba Imchen-i lanur ka tepsetba ken o nung aibelener ana taküm piyong tepoukdak ayutsü obendang agutsü, ta metetdaktsü.
2015 küm Metsüremi/March 29 ayaterm nung Kohima district kübok Viswema village nungi Meciebo Lcho tepsetba atema Khonoma village nungi Kruse Terhuja, Nachama village nungi Vilalhoulie Rupreo aser Kezhaletuo Pielie nunger nem tai tonglokja apu.
Metsüremi/March 30, 2015 nü yimdak telungtet nung tasümang ka anguba nung ajemdaker Meriema Village Council-i FIR ka benokba sülen ken o ka benok, aser Chiteni/July ita nung Investigation Officer UBSI Lichanthung Lotha leniba nung police-i tai tonglokja alirtemji apu, ta paisa ashi.
Public Prosecutor-i ashiba agi, iba ken o akaba mapang nung kuli 13 angadangba sülen Court-i, Jail colony nung Terhuja aser Rupreo nati teka sangshia nisungbaji timtemdaktsü aser alenseta südaktsüba sülen tasümangji tatalokba tesem nungi kilometer 12 shi pilar oa Meriema village anasa indok ta kuli bushiteta tena aitsü.
Ano külen nisung tepsetba ken o nung Pielie bo maitsü, saka Chiteni/July 1, 2015 nungi Tsüklai/February 2, 2018 tashi tepoukdak aliba piyongji temerenshi liasü.
Iba obendang ya taküm Tsüklai/February 2 nü agüja liasü, ta Public Prosecutor-isa shisem.