Luroi/August ita atema Phek DPDB senden ayonga amen

Phek, Luroi/August 24 (TYO): Phek District Planning & Development board (DPDB) senden tanü conference hall, Phek nung menogo, ta tanü ketdangsertem osang ka ajanga metetdaktsü.
Iba senden nung Phek district nungi MLA ajak aden, aser parnoki züngsemtem dang nüburtem mapang tatsüka tenzükba mapang pei aliba tesem nung alitsü ajungshia liasü.
Taküm tesem aika nung anentsüh aluba dak sendakba nung tim departments dang yariteptsü, talisa gari senzüsembongba timtem reprangtsü mepishi.
Tesayur tajungpurtem nem tetushi agutsütsü tetemsü, ibaji ajanga parnoki ano tali tenendakba tanurtem dang sayutsü, ta parnoki bangjema liasü.
Züngsemtemisa nüburtem atema tongtibang nüngdak- gari lenmang aser power ji kanga tongtibang ta bangjem.
Senden nungsa züngsemtemi Manguti yim tsüngda Avakhung nung anisüngzükdak ki ka yanglutsü jembia iba atemaji benoktsü telemtetba agi.
Senden nungsa GHSS, Meluri nung security fencing inoktsü aser metsümeshidak yanglutsü, Chozuba town nung college ka amenoktsü aser Dimapur nungi Meluri tashi hopta shia helicopter service agutsütsü atema jembia liasü. Züngsemtemisa 2018- 19 schemes atema LADP agizük.
Tanü iba senden nung Art & Culture & Youth Resource & Sports, Phek-i department-i inyakba osang metetdakja liasü.