Rijiju-i North East kaketshirtem ayongzük

Itanagar, Luroi (August) 24 (Agencies): Tetoktepba aliba nung takok tajung angutsü atema Northeast nungi kaketshirtemi shisatsü bendentsüla aser pei dak tamang akatsüla ta Union Minister of State for Home Kiren Rijiju-i ashi.
Arunachal Pradesh nungi kaketshir kar den ajurutepa sensaksemdang Rijiju-i ashiba agi, kaketshirtemi extra-curricular activities nunga shilem agitsüla.
Kaketshirtemi subject ka azüngdang, angateta aser shisatsü angutsü atema temulung agütsütsüla, ta paisa shisem.
“Tanü-asüng kaketshirtemi internet, TV aser osangkakettem ajanga angazüker. Iba tajangzük ya taoba mapangbo maliasü. Anungji tetoktep alima nung takok angutsü atema kaketshirtemi shisatsü angutsüla aser pei dak temulung alemttsüla” ta paisa ayongzük.
Bomdila nungi kaketshir 10 den ajurutepdang pai iba tayongzükba agütsü. Kaketshirtem ya August 20 nungi September 2 tashi excursion aoba lir aser iba sentong ya 2nd Arunachal Scouts-i ayongzük.
Delhi nung kaketshirtemi India Gate semdangogo aser parnoki
President’s House, Qutub Minar, Humayun Tomb aser Lal Quila semdangtsü. Parnokisa Dehradun aser Lucknow-i aotsü aser Forest Research Institute (FRI), Indian Military Academy (IMA) den tanga tongtipang tesemtem semdangtsü.