Indonesia menoknok lendong nung asür 555 jungogo

Luroi/August 24, 2018 (Agencies): Indonesia kübok Lombok asetkong nung menoknok tesashi anokba ajanga Rogonü tashünung asürtem ya 555 jungogo.
Tang asürtem züngdangba osang tasen ya national disaster agency odongtar, Sutopo Purwo Nugroho-i Twitter nung sangdong.
Luroi/August 05 nü menoknok asadangba nung magnitude 6.9 anokba ajanga Lombok nung ki, mosque aser shishilembaba tesem meyirijang ter dak tali samatsü. Iba lendong ajanga nisung 1,300 dak tali yiru aser nisung 353,000 jungnüa talidak ki melie tesem balala nungi prokshia lir.
Tang tashi teyari ya khen atema yanglua alibe ki 30,000 nung alirtem nem agütsür aser menoknok agi kongshia aliba tesemi wheelchair 100 yokogo, ta Sutopo-i ashi.
Iba menoknok ajanga Lombok nung takoksa agütsüba ya sen million $348 jenjang liasü, ta ketdangsertemi asadangteta lir.
Iba menokonk ajanga iba asetkong nung tesem karbo centimeter 25 tashi ajungket, ta NASA nungi scientist aser California Institute of Technology indang rapid-imaging project ajanga ashir. Maneni tesem kar nungbo ali ya centimeter 15 tashi atsüzüka alu.
Satellite observation ajanga ketdangsürtemi menoknok aser tanga tesama lendong nung ketdangsürtemi teyari agütsütettsü ta NASA-i ashir.
Taoba ita iba asetkong nung aftershock aikati kongshia liasü.
Yimtsüng kar nungbo iba menoknok ajanga anentsü aludaktsüba nung nisung tajemba agi 12 süogo.
Indonesia ya Ring of Fire nung aliba ajanga mapang shia menoknok agi kongshir. Ring of Fire ya Pacific Basin nung lir, kong volcano aser menoknok kanga pulua adoker.
Luchii/December 2004 nunga menoknok asadangba nung magnitude 9.1 agi Sumatra asetkong nung kongshia tsunami adoka Indian Ocean agi kongshia aliba linük ter dak tali nung nisung 230,000 dak tali taküm samatsü.