4-lane mapa inyakertem amokmerenba aitsür: NSF

Dimapur, Luroi (August) 24 (TYO): NH 29 nung 4-lane mapa yangluba ketdangser aser mapa inyakertem nem timtem agütsüba osang angashia aoksar aser jashir ta Naga Students’ Federation (NSF)-i metetdaktsü.
4-lane mapa kanga meilongi inyakba aser iba ajanga lenmang tesenzü mejungi aliba ajanga public aser senzüsenbongertemi timtem ajuruba mapang ka nung, ozüng alema inyakertemi gari lenmang anepalurtem timtemdaktsüba aser amokmerenba magizüker, ta Tongti Tezülur Imtiyapang Imsong-i sangdong ka nung ashi.
4-Lane project tiptema aser meinprong kecha melii inyaktsü atema ozüng amertemi security peria agütsütsü mepishir. Maneni, mapa inyakertem amokmerenba ken o bushisüngdangtsü aser aibelenertem pua tapet temerenshi agütsütsü mepishir, ta NSF-isa metetdaktsü.