Asian Games 2018: India nunger teburtemi kanga junga shilem agi

Jakarta, Luroi/August 24 (Agencies): India nunger tennis asayar tejen, Rohan Bopanna aser Divij Sharan na longjemer Asian Games 2018 tebur tarep tennis asaya nung gold medal nguogo. Rogonü final asaya nung tena ya Kazakhstan nunger Bublik Aleska aser Yevseyev Denis na den asaya liasü. Asayamung tenzüker anogo pongunübuba nung Ankita Raina-i bronze medal anguba sülen iba yagi tennis nung India nungeri medal tanabuba angur liasü. Tang tashinung 18buba Asian Games nung India nungeri medal 25 tashi ngua lir. Asian Games nung India nunger tebur tennis tarep asayartemi taküm agi ponguben tashi final tongteta asayar asütsü. Kasa asayamung 2002 aser 2006 nung Leander Paes aser Mahesh Bhupathi nati gold medal ngua liasü, Somdev Devvarman aser Sanam Singh natia 2010 nung gold ngutet. Taoba Asian Games Incheon, South Korea nung aliba mapang Saketh Myneni aser Sanam Singh na final nung tsüka liasü. Final nung Bopanna aser Sharan nati Kazakhstan nungi Aleksandr Bublik aser Denis Yevseyev na 6-3, 6-4 agi akok.
Maneni iba asayamung anogo pongunübuba nung rowing nung India nungeri junga shilem magiteti liaka Rogonü anepdang iba tetoktepba nung mezüngbuba gold nguogo. Teburtem Quadruple Sculls team event nung rower Sawarn Singh, Dattu Bhokanal, Om Prakash aser Sukhmeet Singh nungertemi mezüng alizüng tongtet. Kasa anogosa rowing nung Rohit Kumar aser Bhagwan Singh nati Lightweight Double Scull nung bronze aser Men’s lightweight single scull nung Dushyant Chauhan-ia bronze medal ngua liasü. Teburtem Quadruple Sculls team tetoktepba nung India nungertemi mapang 6:17:13 nung alizüng tongteta Indonesia aser Thailand nungertem jakdang tembang.
Iba asayamung tenzüker troknü tembangba mapang India nungertemi gold trok, silver pongu aser bronze 14 tashi nguteta lir.
Shooting nung India nunger shingaia gold mongutet saka 10m air pistol nung Heena Sidhu-i bronze ngua liasü.
Teburtem ama India nunger tetsürtema Kabaddi tenoktepba final nung Iran makok.
Maneni Squash nung Dipika Pallikal, Joshna Chinappa aser Saurav Ghosal nungertem pei tata single semifinal tongteta lir aser parnoki medal kaka busa angutsü.
Iba asayamung nung gold angutsü aser Olympic atema qualify asütsü teimla nung India nunger tebur hockey asayartemi preliminary match asembuba nung Japan madak 8-0 agi koka lir. Asian Games 2018 nung tang tashi India nunger tebur hockey asayartem ya tamakok ajurua mali.
Badminton nunga tebur kija asayar Kidambi Srikanth aser H S Prannoy na tanabuba round nung tsükogo.