POSHAN Abhiyaan & National Nutrition atema senden amen

Kohima, Luroi/August 27 (TYO): Jan Andolan dak sendakba nung POSHAN Abhiyaan & National Nutrition month (Rhastriya Poshan Maah) benoka inyaktsü atema tanü Secretariat Conference Hall, Kohima nung department balala den state level senden ka menogo, ta ketdangsertem osang ka ajanga metetdaksü.
Okila jembidang Department of Social Welfare Secretary, Sarah R. Ritse-i Jan Andolan inyakyimtem metetdakja, kibongtem nung pei chirnur temang aser shisatsü naprongla terenlok nung iba yagi tongti shilem agir aser agent ka lir, ta ashi.
Laisa, Poshan Abhiyaan ya Metsüremi/March 8, 2018 nü India Ato kilonseri tenzüktsü, aser iba ya tanurtem, mashisa tetsütem aser mamatzü agutsür tetsütem atema flagship programme ka lir aser iba programme yagi ‘nutrition’ nung tongti rangloker, ta ashi.
Laisa, shilem lemsar 2020 küm tashi nungbo iba yagi states/UTs 36 aser district 718 ayimjemtsü, ta metetdaktsü.
Additional Director, Social Welfare & State Nodal Officer, Poshan Abhiyaan, Tulula Pongen-i Poshan Maah indang tongmelang agi metetdaktsü.
Laisa, Rongjui/September ita ya ‘Nutrition Month’ amongtsü, aser iba nükjidong ya kibong ajak nung nutrition benjungtsü atema lir, ta ashi.
Laisa, Abhiyaan ya junga mainba, under nutrition, anemia aser low birth weight ajemdaktsütsü atema lir, aser kasa mapatong ajanga tainlonglong tetsürtem, mashisa tetsürtem aser mamatzü tagutsüdak tetsütem dak rangloker inyaker, ta ashi.
Iba mission nükjidong ya arishi küm 0-6 tanurtem rongnung 2022 küm tashi nungbo tanurtem aso junga mainba shilem 38.4 nungi shilem 25 tashi ajemdaktsütsü atema lir, ta laisa metetdaktsü.
Laisa, ita ka piyong campaign agidang kinü tanur anepaluba, mamatzü agutsüba, anemia anema raraba indang ajungkettsütsü aser tetsürtem nutrition, kibong akumtsü atema tetemsü arishi küm indang tesayuba agutsütsü, iba denji külemi hygiene aser merükmeju sayutsü, ta metetdaktsü.
Kasa sentong nung CDPO (Master Trainer in ICDS-CAS), James Ezung-i POSHAN Maah Dash board amshiyim indang metetdaktsü.
Secretary to the Government of Nagaland, Department of Social Welfare, Sarah R. Ritse-i ketdangsüa shilem agir ajaki “Poshan pledge” agia liasü.
Line Depts. of Planning; Health & Family Welfare, NHM; Rural Development, NRLM-i ‘state malnutrition free’ atema peipei mapatong indang presentations agutsü.