Meghalaya: UDP-i MDA sorkar maneni nungittsü

Shillong, Luroi (August) 27 (Agencies): Meghalaya nung United Democratic Party-i Meghalaya Democratic Alliance teloktep nungi mepilatsü aser National People’s Party (NPP) den maneni tesentaktep lia inyaktsü ta metetdaktsü.
UDP MLA aser Tourism Minister, Metbah Lyngdoh-i Hombarnü “South Tura constituency nungi Chief Minister, Conrad K. Sangma aser Ranikor constituency nung UDP candidate, Pius Marweiñ nati takok anguba ajanga MDA sorkar tashi itshir” ta ashi.
August 23, 2018 nü South Tura aser Ranikor by-elections ajanga Meghalaya nung yimten tensa melenshitsü aser Karnataka nung Opposition Congress-i yaria sorkar akümba ama ataloktsü akok ta nisungtemi jembia aru.
Ajisüaka, by-election nung NPP aser UDP nati takok angu, ta Lyngdoh-isa ashi.
Tanü takok anguba ajanga züngsem 60 agi akümba assembly nung NPP aser UDP teloktemi menden teimba kümogo aser Conrad-i chief minister inyaktsü jenjang amentetogo.
Tang NPP nungi MLA 20, UDP nungi 7 aser Independent MLA, SK Sun (UDP associate member) kümogo.
Congress-i UDP nem chief minister menden den par MLA ajak nem minister menden agütsütsü tenlaogo ta olulu kar jembiyonga aru. Meghalaya assembly nung Congress züngsem 20 lir.