Mizoram nung Bru electoral roll revision auya

Aizawl, Luroi (August) 27 (Agencies): Mamit district election office nungi Bru electoral roll revision auyaogo, ta Mamit SDPO Jacob Hlychho-i osangbener dang ashi.
Iba ya taoba hopta atalok. roll revision 6, 7 & 8 form tem auya saka kwi ka auya’ar mejangjateter, ta police-i ashi.
Tripura transit camp nung Bru electoral roll revision inyak aser form temji August 20 nü Mamit district election office-i bener ao.
Brihostibar aonung mejangjatetba nisungtemi office kakpoka atu aser form tem bener ao.
Iba tatalokba bushisüngdangtsü atema August 25 nü SDPO Jacob Hlychho lenisüba kübok Special Investigation Team (SIT) ka tentetogo, ta Mamit district Superintendent of Police Thangzuala-i ashi.
“Bushisüngdang tenzükogo. Election office nungi auya aser police-i auertem aputsü atema akokba tashi mapa inyakdar” ta Mizoram nung joint CEO Zorammuana-ia osangbener dang ashi.
EVM building nung CCTV surveillance maliasü saka security guards liasü. Ajisüaka, auertem jagi security guards maliba tesemleni ki telungi atu aser E-roll revision forms bener ao, ta SIT tekolak Jacob Hlychho-i ashi.
Bru nunger meyipa aruba mapa tang teinyakdak lir aser iba jagi iba ken o ya kanga tongtipang. Aibelenertem aputsü atema onoki kulitem bendentsü merangdar, ta paisa shisem.
SIT teloki Election Office employee 7 aser Mamit YMA ketdangpurtem dang asüngdang süogo.
Mizo aser Bru nunger tsüngda mapang talangka tejaklen nungi meputepi arur aser iba jagi iba ken o ya kanga dang tongtipang ta züngoka bushisüngdang südar, tang tashi nung nisung shinga mapu lir, ta Mamit additional DC-isa ashi.