Assam nung Vajpayee bilemteta ‘Shraddhanjali’ sentong agi

Guwahati, Luroi (August) 27 (Agencies): Assam state sorkari tanü taoba Prime Minister asür Atal Bihari Vajpayee bilemtetba sentong ka agidang Assam Governor Prof Jagdish Mukhi aser Chief Minister Sarbananda Sonowal nati asür Vajpayee nem tetushi agütsü.
Srimanta Sankardev Kalakshetra nung ayongzüka agiba ‘Shraddhanjali’ sentong nung Governor Mukhi-i o jembidang “taoba Prime Minister-i khurettem koktettsü atema olemtep aser tebilemba lemsateptsüla ta asüba nung amang. Iba tangatetba ajanga par sorkar teloktep ketdangsüa otet” ta ashi.
“Vajpayee dak o jembitsü sempet liasü aser pai United Nations nung Hindi oshia agi jembidang iba sempet sayu” ta Mukhi-isa ashi.
Vajpayee dak asayamenü sempet liasü aser Parliament nung party balala tsüngda obang meputepi toktepba mapang nunga pai asayamenü asü aser tensa süngjemdaktsü, ta Assam Governor-isa metetdaktsü.
Chief Minister Sonowal-i o jembidang “Vajpayee-i pa taküm piyong linük atema bendang agüja inyak aser linük longjemdaktsütsü atema shilem tulu agi” ta ashi.
“Vajpayee dak sasapela sempet aliba ajanga pari loktiliba nung nisung ajak atsür aru aser pa meimdaktsü. Yimten tangatetba balala liaka nisung ajaki pa akhümtsübu” ta Sonowal-isa ashi.
Taoba Prime Minister-i Assam aser Northeast nung mapa tajung aika inyaktsü aser mapatem rongnung Bogibeel Bridge, East West Corridor den sendaktepba, DoNER Ministry tem dena lir, ta paisa shisem.
Vajpayee tangatetba sülen anidaka Prime Minister Narendra Modi lenisüba kübok tang Centre sorkari terenlok mapatem inyaker aser India renlokdaktsü atema linük nung alirtem longjemtsüla. Ibaji asenoki asür Vajpayee nem tetushi agütsür ama asütsü, ta Sonowal-i metetdaktsü.
Vajpayee ya Assam nunger medemer ka liasü aser pai Assam Agitation pusema nungit. Pa tetuyuba agütsüba ajanga union ministry temi North-Eastern region renloktsü atgema budget nung shilem 10 endoker, ta Assam Finance Minister Himanta Biswa Sarma-ia metetdaktsü.
Sentong nung taoba chief minister Prafulla Kumar Mahanta, Water Resource Minister Keshab Mahanta, Housefed Chairman Ranjit Kumar Dass aser tangartem aikati Atal Bihari Vajpayee-i Assam den yaritepba aser NE nung terenlok mapa inyakba indang jembi.