Governor Acharya-i Chennai nung NE nunger den sensaksem

Dimapur, Luroi (August) 27 (TYO): Nagaland Governor PB Acharya-i NAMASTE States (Nagaland, Arunachal Pradesh, Manipur, Meghalaya, Mizoram, Assam, Sikkim, Tripura) dang pei oshi aser sobaliba atema nüma atangtsü aser Northeast India renloktsü atema pei dak aketba sempet aser shisatsü amshitsü ayongzük.
August 26, 2018 nü Hotel Savera, Chennai nung North East India Community den sensaksemdang Governor Acharya-i iba olen jembi.
Chennai nung aliba North East nungertemi pei sobaliba atema nüma atangtsü aser tazüngertem aser sempet alirtemi Northeast renlokdaktsütsü atema mapa inyaktsü atema paisa ayongzük.
Nisung shingaia pei tetsü oshi mamatsüla kechiyong ibaji nisung ka atema mezüng maitsü lir. North East India indang sobaliba takar sayutsü atema North East nungertemi sobaliba sentongtem nung shilem agitsüla, ta Acharya-isa ashi.
Paisa lanurtem dang entrepreneurship mapa inyaktsü aser mapa bushirtem masü saka mapa agütsürtem asütsü atema ayongzük.
Centre aser state sorkar indang Welfare schemes aika lir anungji lanurtemi item scheme ajanga pei pei business tenzüktsü akok, ta Governor-isa shisem.
Iba sentong nung Chennai nung aliba kaketshir aser mapa inyakertem dena Northeast India Community züngsemtem aden.
Sentong nung mendenji North East India Welfare Association Chennai (NEIWAC) Wapangtoshi Longkumer aser NEIWAC Secretary Tluanga Colney-i NEIWAC indang osang tatsüka metetdaktsü.