Tzünglu ajanga Periezie colony nung alirtem timtemer

Kohima, Luroi (August) 27 (TYO): Taoba anogo ishika tzünglu kanga aruba ajanga Kohima kübok tesem aika nung timtem bentsür aruogo aser talisa Periezie colony nungbo ki 45 tashi raksa aser kibong tenet anienogo.
Colony ya Department of Fisheries & Aquatic Resources Kohima kübok lir aser taküm tzüngluruwa nung ki 100 dak tema kongshiogo. Ajisüaka tang tashi nung nisung asüba mesüra yiruyibongba kecha mali, ta Periezie Colony Chairman, Akhie Liezietsu-i osangbener dang ashi.
Ki teimbaka terara raksaba lir saka RCC ki 8 den kutcha ki 37 tashi kanga mejungi raksaogo aser kibong tenetbo Khedi Baptist Fellowship, Rüliezou nung khen atema yangluba tent house nung jenoka lir, ta paisa ashi.
Ki aika chireptsü tia lir aser kibong karbo ki teraksa nung lidar. Iba kiyong nung anentsüh timtem ya taküm July ita nungi tenzük aser KMC dumping site nung anentsüh kanga aluba ajanga kiyong nunga kongshir, ta Liezietsu-isa shisem.
Tanep kiyongi aruba gari lenmang kanga mejungi anenzüka aoba ajanga gari ka dang mesenzüteter. Iba atema KMC-i JCB ka amshia lenmang lapoktsü meranger saka garitem mesenzüteter, ta paisa metetdaktsü.
Par colony nung anentsüh aluba ajanga Rüzhükhrie Government Higher Secondary School, Government Polytechnic, Christ for The Nation Bible College, Directorate of Fisheries & Aquatic Resources aser IG Stadium Gate-1 kongshir, ta paisa ashi.
Kohima DC aser NSDMA ketdangsertemi colony semdangogo aser sen den relief materials agütsüogo. Temeimertemi tenla agütsüba ajanga colony puri gari lenmangtem yanglutsü meranger ta Liezietsu-isa shisem.
Colony nung teraksa tulu mangutsü atema District Disaster Management Authority, Administration aser sorkar dang ayong nung Check Dam ka tangsa yanglutsü atema colony panchayat-i tezüluba ka agütsüogo, ta paisa ashi.