Kiphire yaridi

Taküm Nagaland nung tzünglurawa tenzüker tesem aika nung anentsüh aser tzümetsüng lendong balala ataloka nübortemi timtem jenti ajurua arur. Ajak dang tamajungtiba kongshiba tesemji Kiphire district lir aser osang angazükba agi iba district nung alirtem jangotsü aser tang nüngdakbatem peria mongui kanga tim atemer. Taoba Hokolbarnü jang abenba truck gari asem Kiphire tonga ao aser idangji nisung noklang aika adenshia jang alitsü atema raktepba asenoki osang angashiogo. Atangji Kiphire nung alirtem mapang talangka kanga timtema arudar saka state sorkari anir, kija aser mulungtet teloktemi Kiphire nung alirtem teyaritsü tim meyarir ama bilemer. Timtem maremteti Deobarnü Seyochung Area Students Union (SASU)-i sangdong ka nung Nagaland Chief Minister dang nübortemi aginüba ama Meluri aser Kiphire tsüngda gari lenmang raksa aliba yanglujang ta mepishia metetdaktsüogo. State sorkari Kiphire nung khuret ajurua aliba atema temulung magütsür ta parnoki sasaba olen ka shiogo aser sorkari ita ana tsüngda lenmang meyanglushira parnoki takhangba agüja lungkak aittsü ta SASU-isa metetdaktsüogo. Yimya agi asen lima nung alima lendong balala ataloka nübortem timtemdang sorkari anir nisung ajaki akokba tashi yariteptsüla sernung Kiphire nung alirtem kechiba meyarir ta ratar. Asenoki anogo ishika tejaklen meyipa reprangdangra, Nagaland state sorkari Kerala nung tzümetsüng timtem nung yariteptsü atema sen crore 1 tenla agütsüba osang angashiogo. Ano, taoba hopta telok kati Kohima nung “Nagaland for Kerala Concert” ta ser sentong ka ayonga agiogo aser iba kenten sentong nung aruba senji Kerala dangi yoktsü ta angashiogo. Hao, tangar yaribaji nunga ta mashir aser asenoki akokba tashi tangar yaritsüla. Ajisüaka, asen lima nunga timtemer tasüng lir sernung mali ama tangar asoshi ang temulung tali agüja yaribaji mazü aser tim masü. Nagaland state sorkari Kerala nem sen crore 1 teyari agütsür süra, Kiphire nung alirtem aser ano Nagaland kübok tanga tesemtem nung anentsüh aser tzümetsüng ajanga timtemertem nem-a sen kwi lemzükja yaridar? Kerala atema kenten sentong temeja ka ayonga agir süra, iba telok jagi külem Naga nungertem yaritsü atema-a kasa sentong ayonga agitsü tebilemba lir asü mali? ta tasüngdangbatem arur. Kiphire nung timtemertem yaritsü atema shingaia sentong matonger na ta bilema lia, Dimapur aser Mokokchung nung alirtemi kanga dang shisa kaa Kiphire atema ta ser sentong balala ayongba osang angashidang kanga pelar. Dimapur24×7 ta ser social media nung telok kati ‘Dimapur stands for Kiphire’ ta ser sentong ka tenzüka lir aser parnok indang Facebook page nung iba sentong ya September 5, 2018 tashi agitsü aser iba nung bendentetba ajak Kiphire nung alirtem dangi yoktsü ta metetdakja lir. Ano, külen Mokokchung District Musicians Association (MDMA)-ia ‘Mokokchung for Kiphire’ ta ser kenten sentong ka ayonga lir aser iba nung sen aruba jagi Kiphire nung alirtem yaritsü ta parnok indang Facebook page nunga shia lir. Iba ama mapa tajung shisateta inyakba atema telok ana nem tenüngsang agütsür aser Nagaland nung tanga teloktemia Kiphire nung alirtem aser ano tanga tesemtem nung timtemertem yaritsü atema peii akokba sentong atonga aser mapa inyaktsü ayongzüker. Dimapur24×7 aser MDMA teloktemi inyakba mapa nung asenokia asen akokba tashi mulungsoa tenlatepdi arungma ta ayongzüker.