DMK tapu tasen ka tenzüker

Tebu M. Karunanidhi indang yimtenren senmang agizüka aser Dravida Munnetra Kazhagam (DMK) nung ajaki agizükba lennir ta M.K. Stalin-i jenjang ngutetogo, saka pa iba jenjang angutsü atema pa atema tayongzükba tulutibaji party sasep nungi masü saka par kibong nungi adoka liasü. Karunanidhi’er jabaso ta asüba ajanga Stalin-i yimtenren mapa inyaka arudang teyari aika nguyonga arur aser tang pai tedi M.K. Alagiri den obang meputep aliba koktettsü atema mapang ka ajurua lir. Mongulbarnü Stalin den tetokteper shinga melii DMK nung Tir jenjang angu. 2014 küm Karunanidhi-i ashiba nung ajemdaker Stalin tedi Alagiri party nung züngdoka liasü aser iba jagi DMK tir atema tetoktepba nung Alagiri-i shilem magitet. Mongulbarnü Chennai nung DMK general council senden ajanga telok sasep nung Stalin pusemertem teimba lir ta asüba kuli sayauogo.  Tedi Alagiri pusemer ta asüba lennirtem aikati Mongulbarnü Stalin nem tir inyakdaktsütsü mulunga lir ta nangzük. Stalin-i party sen aser rongsen tim mesüi amshir ta tai tonglokja Alagiri-i party adena orr tenu anema rarar aser pai September 5 nü Chennai nung rally ka alitsü ayonga lir. Stalin-i election tem nung DMK takok ngua len anir otetra Alagiri-i party sasep nungi pa pusemtsüpurtem manidentettsü. Karunanidhi taküm alidang Alagiri-i maongka magitet. Külen, Stalin-ibo kanga dang aremzüka ata aser pai kodang party tangatetba anema menoktak. Tang Stalin atema shisabulu tulutibaji yimtenren tsütsü pa den tetoktepertem lir. Lok Sabha election agitsü atema küm ka majung dang anünga lir, saka pa atema election tongtipangji Tamil Nadu Assembly election asütsü. Tang Tamil Nadu nung sorkar indang kümsük küm asem anünga lir aser iba sülen jiang Assembly election agitsü, saka Edappadi K. Palaniswami-i aniba All India Anna Dravida Munnetra Kazhagam (AIADMK) sorkar kümsük matongdang chireptsü ta Stalin-i imlaa alitsü südi. Kechiyong iba teloktep sorkar nungi pila aoba züngsemtemi telung nung mapa inyakdar aser külen sorkar den yariteper Bharatiya Janata Party (BJP)-i sorkar nung shilem tuluba agitsü kanga meranger. DMK-i Congress den tesentaktep akangshia lir aser telemsa adoka aliba AIADMK madak parnoki takok melamela angutsüba liasü, saka Tamil Nadu nung film actor tem- Kamal Haasan aser Rajinikanth natia yimtenren nung tetsüng ajemokba ajanga Tamil Nadu yimtenren wadang nung temeyoktep aika adokogo. Mongulbarnü Tir inyaktsü shimba sülen Stalin-i pa aser DMK telok yanglushitsü tebilemba lir ta ashi. Paisa, DMK tir ama mezüng onük jembidang Prime Minister Narendra Modi aitsü aser par sorkari India ajunga Hindu nunger lima ka akümtsü meranger ta ashi. “Oshi ka dang amshitsü merangba party anema onoki noktaktsü” ta Stalin-isa Modi anema jembia liasü. Tang India kübok state balala nung BJP ainba mapang ka nung aser talisa Tamil Nadu teloktep sorkar nunga BJP dena ketdangsüa aruba mapang ka nung Stalin-i koba tashi ka nung DMK ketdangsü aotsü ta nisungtemi tenük yoka repranger. Küm 50 jungnüa tebu asür M. Karunanidhi-i DMK tir ama kanga dang tashi itta par telok len anir aruba sülen Stalin-i pa lenisüba kübok DMK len anir aotsü tenzükogo aser iba ya DMK atema tapu tasen ka tenzükerba lir.