Ozüng amshitettsüla

Küm paikati Nagaland renloknüyonga merenloktetba timtem tulutibaji ozüng shitak mamshitetba ajanga lir. Aiben government nung alirtemi Nagaland nung terenlok mapa takok ngua moutetbaji center nungi sen peria meyokba ajanga lir ta jembiba angashir. Atangji, alima nung sen agi tagishi maka, anungji terenlok mapa inyaktsü atema tangbo sen peria lir ta asüba anogobo majurutsüa akok. Ajisüaka, kechi aka ibaji shitak amshia terenlok mapa inyakra, terenlok maliba agi pei lima agi nümamedangtettsüsabo mataloktsü. Tanü Nagaland nung light junga maruba, lenmang junga meyanglutetba, mozü ki aser kaketrejutem shitak anepalu mesütetba ajak ya sen makaba agi masü saka ozüng shitak mamshitetba ajanga lir, Ozüng shitak amshitsübaji terenlok mapa inyaktsü atema sen lemzüktsüba nungi tenzüker. Tanü Nagaland nung government-i terenlok mapatem inyakba jenjangji reprangdangra, shitakba agibo, sen crore ka agi renemtsüba mapa atema crore ter lemzüktsür. Ibaji kecha table nunga nungah ta ashitsü makok, anungji ozünga mali ama tenük amur senotsü talila lemzüktsür. Ozüng raksaba mapaji yang nung jagi tenzüker. Iba sülen mapaji merenemer, anungji ano tanaben estimate yangushir, idangjibo kasa mapa renemtsü atema latetba sen jenjang dang nungi noklangben agi teimba küma latetter. Iba amaji ser külena ano mapa merenem aika bangdaka lir. Aji oda, lisopur koma yamaji bendangertemia amshitsü aser inyaktsü asünungji, Nagaland nungbo Nagaland PWD purtemi anepaluba lenmang dang masü saka Border Road Organisation aser National High Autorithy purtemi anepaluba lenmangtemang tamajungba angur. Lenmang anepalur mali lenmang tiyong nung motzü yimdaktsür aser lenmang lendi tashi adoka arem agi meyipangaka kibur mali, anungji tebushir mali lenmang agi ayong kümdaktsür. Ozüng lateta liaka mamshir asünungji, tuluba nungi tilaba tashi pei sünütsü asür. Mapai maoyonga kecha temerenshi mali, angati ita sen angutsüba dang aser mapa meinyak ser sen agizüka achiyong tebushir mali, machirtem dang takoksa ta bilemtsüsa asen lima nung inyakteper. Tanga Dimapur aser Kohima na tsüngda khen nung gari pezü tsüiteptettsüsa lenmang yanglur company tulu arua teyangludak nung, parnok meyong gari auyaa bener aor aser mapa inyakertem merenshir ta asüba timtem agi mapa inyakertem jena orr mapa anena lir. Ajisüaka, ozüng mamshiba agi mapa inyakertemji takoksa aser parnok amokmerenertemji dang tia ajung ta ajaki bilemtsüsa tanü Nagaland tesem balala nung atalokdagi. Ozüng raksartem anema ozüng mamshitetba limaji tetsübutsüka lir. Tang amaisa aonungbo memenui police station-tema ozüng raksartemia agiaadoktsü aser government senpong anükertemji ozüng raksartem dang asütsü. Idangjibo terenlok mapa ajak mapa ashir aser alima meimertemi masü saka senotsü ajangzüktsü atema ozüng raksartemi dang inyaktsü. Iba tensa tiaji tanüa state government inyakyim aika nung reprangtetter. Mapabo meinyak saka senbo ajak chima adok, mapabo mali saka inyakertembo shimpet shimer ta ozüng mali ama pei sünütsü süa sademsadema inyakba limaji asen lima lir. Ajak nung ochimashi agi sünga lir saka ochimashir apuba osangbo mangashir, ajaklen tashiyim agi sen sarur, gari auyar aser nisungtem amokmerener saka parnokji pua merenshitsüsa ozüng amer mali kümogo. Ozüng amertemiang ozüng raksar asü mesüra ozüng raksartemiang ozüng amer ta asüngdangtsüsaba tia nung asenok lir. Tanü asenoki ozüng mali ama küma litetba ya, shirnok atema kechikoma lima ka yanglutsür ta asenoki kanga shisabolua bilemtsüla. Tanü asenoki ozüng shitak mamshiba agi mapa aika melamelaa takok ngua inyaker amai inyaker, tajangzüka tulu angur aser kanga sademsadema alir, saka asen lima yangji matemtsü. Tang yangluba lima nung yabo auer aser tashiyim amshir dang litettsü. Iba lima nungji asen chirnurtem koma alitsü  ?