India nunger anati Magsaysay award angu

Manila, Luroi (August) 31 (Agencies): Hokolbarnü India nunger ana nem Ramon Magsaysay award agütsüogo.
Iba sempet dang Asia indang Nobel Prize ta ajar. aser Bharat Vatwani o Sonam Wangchuk nati sempetjoi agizük.
Manila nung sentong ka agidang Cambodia nungi activist Youk Chhang, Philippines Filipino nungi Howard Dee, Vietnam nungi Vo Thi Hoang Yen aser East Timore nungi Maria de Lourdes Martins Cruz nunger nem-a sempettem agütsü.
India nunger Vatwani-i pa taküm piyong yimdong nung tekolok meshitakertem yaria arur. India kübok tesem balala nung tekolok meshitak 400,000 shi lir ta asadangteter. Vatwani-i lapokba Shraddha Rehabilitaion Foundation nung telokok meshitakertem jenokdaktsür aser anepalur.
1988 nungi Vatwani-i tekolok meshitaker nisung 7,000 shi yariogo aser parnok aika tanaben pei pei kibong den ajurutepdaktsüogo.
Ano, India nunger Wangchuk-i India anüdoklentip tsütsü temelenshi bener aruba learning systems inyakba atema sempetji agütsü.
Pai Ladakh lanurtem yarir aser rongsenren tsütsü renloktsü atema tesayubatem agütsür.
Wangchuk ya Students’ Educational and Cultural Movement of Ladakh (SECMOL) indang founding-director lir. Iba telok ya 1988 küm Ladakh nung kaketshir telok ka tentet.