Lanur saisapongertem dak teimla lir

Indonesia nung 18 buba Asian Games nung saisaponger aser ketdangser parnok 804-i India tenüng nung shilem agia liasü aser saisapong balala nung medals 69 tashi nguteta, sempet angurtem tarensen nung India-i jenjang 8 buba nung tembang. Taküm Asian Games nung India saisapongertemi gold 15, silver 24 aser bronze 30 tashi ngutet aser iba ya India atema taoba Asian Games dang nungi medals teimba ngutetba asayamung ka lir. Asian Games ya alima nung saisapong teimtiba aliba sentong tulutiba rongnung tanabuba lir aser taoba hopta ana tashi saisapong balala nung India tenüng nung shilem agirtemi konang-nüngsang aika bentsür aruogo. India-i küm aika saisapongbaren tsütsü tangar memenepi aruba sülen tang saisapongertemi iba tetsükdaktsüji kokteta tangar den tokteptsü koka lir ta shilem tajung agia kuli sayuogo. Jakarta aser Palembang nungi India nunger saisapongertemi medals bener aruba ajanga, cricket kanga dang sapuba linük nung nübortemi Olympic saisapongtem-a saputsüsa tensa ka bentsür arutsü imla atar. Arishi küm 15 tain Shardul Vihan-i anir arishi küm 60 tain Pranab Bardhan nungertemi taküm Asian Games nung India nunger atema konang tetushi bener arutsü. Saisapongbaren nung India atema tarutsü nükla tajung lir ta teimla tulu ayubaji, taoba hopta ana tsüngda India lanurtemi kanga junga shilem agiba ajanga lir. Asenoki reprangdangra, shooting nung India atema gold medal angusangji arishi küm 16 tain Saurabh Chaudhary lir saka men’s double trap nung pa den tanubo küm 15 tain Shardul Vihan-ia silver angu. Maneni, men’s trap nunga Lakshay Sheoran (19)-i silver angu aser India nunger kati under-20 junior world championship nung mezüng takok angula, arishi küm 18 tain Hima Das-i Asian Games nung la jenjang tajungba küma shilem tajung agiteta liasü. Hima-i national record anaben tashi yangluteta lir aser Asian Games 400 metres nung lai silver medal angu. Javelin nung gold medal angur Neeraj Chopra aser wrestling nung bronze angur Divya Kakran na arishi küm 20 dang lir. Ano, shot-put nung gold angur Tajinder Singh Toor aser P V Sindhu nungertem arishi küm 23 tain lir. Men’s 400 metres nunga arishi küm 23 tain Muhammed Anas-i silver, arishi küm 23 tain Dutee Chand-i 100 metres nung tera agi dang gold mongutet. Takok mongutetba India lanurtem rongnung pistol shooter tem- Manu Bhaker (16), Anish Bhanwala (15) aser Elavenil Valarivan (19) nunger lir aser long jumper M Sreeshankar (19) nungertem dena lir saka parnok nem training shitak dang agütsüra, tarutsü nung takok tajung angutsü teimla akar. Lanurtemi shilem tajung agiba ya India atema osang tajung aser saisapong balala nung lanur tajung jenti adokba ajanga India asoshi saisapongbaren tsütsü tapu tasen ka tenzüktsü südi ta bilemer. Küm ana dang lir Buenos Aires, Argentina nung Olympics amungtsü anungji India nung saisapong balala ketdangsertemi tim lenmang nung aser tangatetba tajung nung merangra, India saisapongertemi taküm dang nung takok teimba aser tuluba ngutettsü ana nung dang lir. Tesüiba mapang Centre nung sorkartemi saisapongbaren jenjang tajungba kümdaktsütsü atema mapa balala inyaka aruogo aser tang aliba sorkari Khelo India programme ta ser, India nung saisapongba sobaliba asentenshitsü aser India ya saisapongertem adokba linük ka kümdaktsütsü atema alizüng yur mapa balala inyaka arudar. Anungji iba mapa tajung ya state ajak nung sorkartem aser ketdangsertemi nendaka inyaktsüla aser lanurtem teyaritsü tim yaritsüla. Tarutsü nungbo China ama India-ia saisapongbaren nung takok tulu ngutettsü alizüng yur aser linük nung cricket dang masü saka tanüngba saisapong ajak nung temulung agüja ketdangsertemi mapa inyakra, taküm Asian Games nung otsü tasen yanglubaji amatsüsa saisapongertemi aser talisa lanurtemi India atema konang-nüngsang bener arutsütsü.