Arogo jaklaliro tapu ana

 ~ L.Kika Pongener.

Luke-10:39-40. “Aser Mari-i Kibuba tsüngdang mener pa tesayuba o anga. Saka Martha-bo kidang mapa jenti agi mazüngi timtemdaktsü”. Yisu alima nung alidang, kenü anogo pai kanga meimba, pa tembar adianu-aianu asem- Martha, Mari aser Lazar, parnok semdangi ao, aser iba anogo nung lar kidang mener parnok sensak-asemba mapang atalokba otsü ka nungi asenoki, “Arogo jaklaliro tapu ana” indang lesson kar agidi. Rajema angatettsü atema Paul-i Efesa nunger dangi züluba shiti nung shisemba ama, Arogo ya kinungtsü (tetsür) aser Yisu Khrista-ji kinungbu (Yisu Khristaji kiyimsang aser aser Arogoji kiyimla/tetsür) ta angateta yudi. Anungji iba tatalokba otsü nungi asenoki Martha o Mari na ya Arogo ana den medemdanga lesson kar agitsü merangdi. Kodang Yisu-i lar kidang mener tena dang Tsüngrem O sayutsü tenzük, Mari-i Yisu tsüngdang mener pai sayuba o temulong ajunga agi nendak-nendaka angaa amen.
Ajisuaka, Martha-bo ki mapa jenti agi temulong animesungzükteti timatem aser mazüngi inyak. Ajiser Martha-i Yisu dangi arur ashi, “Kibuba küno-i kü kisüng nem mapa ajak inyaktsü nungloktsür, aji nai meshisadanger ama? Anungji ni yariang ta la dang shiang”. “Saka Yisu-i la dang ashi, Martha, Martha, mapa aika indang nai shisabulua timatemer. Saka ka dang tenüngdaktsü lir. Aser neno Mari-i la nungi bener maotsüsa tajungtiba shilem-ji shimtetogo”. (Luke-10:40-42). Tanü putu nung Arogotem aika Martha ama Arogo terenlok mapa-mapa kisüng nung rangloker mazüngi inyaktepdang, Tsüngrem O bushiba aser sayuba, samaba tanela bushiba aser anir aruba, item mapa agi anungakongba Arogotem aika lir. Yisu-i Arogo nem inyaktsü nungloktsüba tongtibangtiba “Osangtajung tenyaba mapa” ajibo tezülen senzüka toktsüba Arogotem aika angur. Mari-i Yisu tsüngdang ajemalua mener Tsüngrem O tesayuba nendak-nendaka angaa amen, saka Martha-bo kanga tesasatsüka, ki mapa nung dang temulong ajunga ayu.
Aji oda, tanü Arogotem Mari-la ama Tsüngrem O nendaka bushiba, Laishiba tesayuba nem Arogo anidaktsüba aser tanela nung ainba Arogotem aika meli-i küma odagi. Atangji, tanü putu nung Arogotemji jungjunga reprangdangra, aika alima temenen nem moksepdaktsür, alima tashitemetet aser rongsen-ang kibur kümdaktsür, alima yimten tazüokba tashi nem Khristar Arogo alendaktsür, tanela jenjang nungbo rajang kümer, alima lokti-tentet ka dang mesüka küma aoba Arogotem aika angur. Aji oda, iba amai temeshiba o temenen na mebendangteti meyoktepa aliba tensa mapang ka nung Yisu Khrista arura, tetsür ana semki ka nung tsük sena lia ka toktsür ka anir aoba (Mathi-24:41) ibaji mesüka ajurutsü südi. Tasüngtet aiür ter milen renema bener kiyimsang arudang agizüktsü ataa lia, aoksa-a kiyimsang arudang, shisa taka aiür pongu milen nung totzü shidak inoker renema liasü, saka tamashi aiür pongubo milen nung totzü shidak meinok renema maliba ama (Mathi-25:1) Arogotem aika alitsü südi.
Aji oda, tetsür ana semki ka nung tsük sena aliba ka toktsür ka anir aoba, aji-a Arogo ana jaklaliro balala, ka tekümtet kaa kümzüker aliba renema aser kabo mekümzüki aliba Arogo tatishitsü asütsü. Ano tasüngtet aiür ter kiyimsang agizüktsü renemer ata-a aliba shisa taka aiür pongu aser tamashi aiür pongu, aji-a teti renema aliba Arogo aser merenemi aliba Arogo tatishitsü asütsü. Atangji Arogotem aika terenlok mapa kisüng nung rangloker mazüngi inyaktepdang, Yisu-i nungloktsüba tongtibangtiba mapatembo tezülen senzüka toktsüa alitsü akok. Tanü Arogotem aika sorkar takar department den kasa terenlok mapa nung tesüngmangtsüka manger mesangwa tsüngda renloka aoba angur, saka tanela jenjangbo tesüleni atsüngzüka ojen aoba Arogo aika lir. Arogo telung nung sama-a aliba santem bushitsü, talisa mozü-lar, yi-lar, sentep-ki mongudanger, Arogoji kechi’ar memetet, tershilem tenla kechi dang ajar memetet, item mesükba Arogopurtem dangi, künep-konung, anep-awa kibong kar danga kiboksema aotsü melena, tanga alima terenlok mapalen-ang mazüngi jajaba Tsüngrem tenzükertem aika dang lir. Ano kanga-sa tesasatsüka, Tsüngrem lartem aser Arogo nung tongti-tenzükertem den Arogopurtem lokti nüngdak aser kibong nüngdak mesüra tanelaren nüngdak kar asoshi kanga ajuruner sernung, appointment mongutetba-a karbo alitsü akok.
Alima yimten lennir VVIP kar ajurutsübo mela-melaa ajuruteter, saka Arogo nung Tsüngrem lartem aser tongti-tenzükertem ajurutsübo, hopta suia, ita songtema nunga appointment mongutetba-a karbo alitsüa akok. Aji oda, idangji Arogopur aika metsüdaker aser Khristar Arogo ka jakla memesüki sayur. Ano kangasa tongtibang kaji, Arogo-ibo madentsüba aser shilem magitsüba mapa nung Arogo nung tongti tenzükertem-ia shilem agia adenba ajanga Khristar Arogo ka tetla-tetshia tenüng menükdaktsür aser Arogopurtema aika metsüdaker aser yirudaktsür. Ano kangasa tesasatsüka, tanü putu nung yimsusur aser lokti lennirtemi Politics inyakyim den tamang yimsu inyakyim mependangteti meyoktepa benshiba, ibala mesukba yimya masüba limapur mapatem ajanga tamangertem aika mashileni anir aser Khristar Arogotem menena kümdaktsür. Tsüngrem O-i ashir, “Mamangertem den sungra kasa nung teputep, kechiyong temeshibaji temenen den kechi nung puteptet” ? Anungji parnok rongnungi adoka balaka liang ta Kibubai ashir” (2 Korint-6:14 & 17). Ano Tsüngrem o-i ashir, “Osang tajung indang sayutsüngirtem tetsüngji koda tobur tajung”…(Rom-10:15). Osang tajung sayutsüngirtemji, Tsüngrem lartem aser Arogo nung tongti-tenzükertemji lir. Atangji arogo-ibo shilem magitsüba mapatem nung oa tetsüng ajemoka denra, osang tajung abenertem tetsüng topur tajungji topur mejungi menena kümadoktsü.
Arogo ka Yisu Khrista jaklaliro mesüka aintsüba aser yanglutsübaji Arogo nung tongti tenzükertem dak tuluka keta lir. Yisu Khrista jaklaliro mesükba Arogo, Tsüngrem O nung tera-ayangba aser akang-akanga soittba Arogo, Laishiba tesayuba aser tetuyuba nem anidaktsüba Arogo, Tanela Temeshi agi asüngba Arogo, alima sobaliba temzüng-ozüng nungi balaka bendanga pilaa ayuba Arogo, Arogopur tsüngda tanak-temesüng telemsa makai arok külem kasa telongjem ka nung aliba Arogo, iba ama tasüngtet Arogo ka yanglutsü asoshi Tsüngrem lartem, Arogo nung tongti tenzükertem aser Arogopurtem ajak shilem lir.