Vinicius Jr dak Atletico asayar kati angu

Rongjui/September 3, 2018 (Agencies): Real Madrid nungi Brazili nunger asayar Vinicius Jr.-i Amungnü reserve-team derby asaya ka nung goal ana idaktsüba sülen Atletico pur asayar kati pa dak angu.
Arishi küm 18 tain Vinicius ya Real-i Aami/June nung Brazil club Flamengo nungi euros million 42 ($48.7 million) agi ali saka tang tashi nung mezüngbuba team nung asayatsü maongka mongui reserve side Real Madrid Castilla nungi third division nung asayaa arudar.
Amungnü derby asaya nung Real pur atema goal anaprongla pai idaktsü saka Tachi den mangatettep adoka liasü shibai ball raktepba mapang nung Vinicius tekolak nung angutsü meranga. Tachi nem red card bo magütsü saka yellow card ka agütsü aser kasa mapang nung Vinicius nema iba telemtetba anema nokdakba atema yellow card ka agütsü.
Barcelona forward Luis Suarez-i Ajax, Liverpool aser Uruguay nungi asayaba mapang tangar dak anguba atema tamajungleni kanga nüngtugu aküm, ajisüaka pa 2014 küm Barca nung adenba sülen nungi tang tashi nung shinga daka ngua mali.