Dominic Thiem, Nadal aser Williams Quarter-final-i iogo

New York, Rongjui/September 3 (Agencies): Seed tekububa nung alisang Dominic Thiem-i Amungnü South Africa nunger asayar Kevin Anderson madak takok ngua tang mezüngbuba U.S. Open tebur kija tennis asaya quarter-finals tongtetogo.
Thiem ya taküm French Open nung runner-up liasü aser pai 7-5 6-2 7-6(2) agi Anderson madak takok angu. Tanü asaya nung Thiem-i kanga junga asayaogo aser pai baseline nungi pilaa nokdaker Anderson-i zükloktsüba ball ajak agizüka asaya.
“Iba asaya ya tang tashi nung kü asaya rongnung tajungtiba ka asütsü,” ta Thiem-i court nung sensaksemba mapang ashi.
Anderson aser Thiem na hardcourt nung trokben asayaogo aser asaya trokprongla Anderson-i koka lir, ajiüsaka Amungnü asaya nung pai junga masayatet.
“Ni tezü atanger. Ni iba asayamung tatem tashi asayanüa liasü, saka aji tiatsüa maliasü südi. Iba ya Dom indang anogo liasü aser pai kanga junga asayaogo,” ta Anderson-i ashi.
Kasa asayamung tanga asaya ka nung top seed Rafael Nadal-i Georgia nunger asayar Nikoloz Basilashvili 6-3 6-3 6-7(6) 6-4 agi koka Dominic Thiem den quarter-final asayatsü jangjaogo.
World number one-i set ana akokba sülen iba asaya ayong ayonga akoktsü ama bilem saka Georgia nunger asaya yagi kanga junga asaya tasembuba set akok.
Tena tsüngda ghonda asem ser minute 20 asayaa liasü.
“Asaya ana atonga kanga saka kokogo,” ta Nadal-i ashi, shiba anogo ana tejakdang Russia nunger asayar Karen Khachanov den kanga meranga asayarang akok.
Nadal-i arishiküm 26 tain Basilashvili tenüng sangogo shiba tang mezüngbuba top 30-i aitsü lir.
“Pai ball kanga tashi agi züka kanga junga asayaogo,” ta Nadal-i ashi.
Maneni US open Amungnü tetsür kija asaya nung Serena Williams-i 6-0 4-6 6-3 agi Kaia Kanepi madak takok nguogo. Iba takok ajanga la quarter-finals nung jenjang ka ngutetogo aser Grand Slam title 24buba koktettsü asoshi tang jenjang tajung ka nung lir.
Mezüngbuba round nung Simona Halep tsükdaktsüba sülen jenjang 44 buba nung alila Kanepi-i tanü asaya nunga Williams akoktsü ama bilema liasü saka iba asayamung trokben tashi koker alila Williams-i kanga tashi ita asayar iba asaya kokogo.
Quarter-final nung Williams, Czech tsür Karolina Pliskova den asayatsü, shibai 6-4 6-4 agi Australia tsür Ashleigh Barty kokteta quarter final tongogo.