Sorkari RMSA tesayurtem indang onük jangjashitsür

Dimapur, Rongjui (September) 3 (TYO): Nagaland nung RMSA tesayurtemi lungkak aityonga aruba indang osang sorkari jangashitsüogo.
RMSA tesayurtem ya RMSA mission authority ajanga shimba lir aser parnok mapa nungi shimokdang telatetba kar liasü, ta Principal Secretary to the Government of Nagaland, SE & Ex- Officio Vice Chairman, Executive Committee Menukhol John-i ashi.
RMSA tesayurtemji contractual basis nung shimok aser teshimertemi ita ka jelia parnok mapa tembangba osang metetdaktsütsü akokaser parnok mapa inyaktsüba kümsükji RMSA scheme den külemi tembangtsü ta lateta lir, ta Menukhol John-isa metetdaktsü.
Parnok indang itasenji MHRD Government of India-i iba mapa atema sen agütsüba ama agütsütsü aser GOI nungi itasen meshia lungkak aitba sentongtem magitsü ta lateta lir, ta paisa shisem.
Government of India, Ministry of Human Resource Development, New Delhi-i 2018-19 nungi taoba mapang Sarva Shiksha Abhiyan (SSA) aser Rashtriya Madhyamik Shiksha Abhiyan (RMSA) ta aliba ka küma lokteper ‘Samagra Shiksha Abhiyan’ ta ajatsü metetdaktsüogo. GOI-isa 2018-19 nungi RMSA Subject Teachers nem ita shia sen 25,000 agütsütsü latettsüogo, ta Menukhol-isa sangdong nung metetdaktsü.
Anungji, item tesayurtem dang Rs.31315 agüja aliba nungi ita shia Rs. 25000 agizüktsü atema osang metetdaktsü. Iba osang sangoktsüba sülen nungi tang tesayurtemi lungkak aiter, ajisüaka parnok nem tang agütsüba ama Rs. 31315 agütsütsü atema RMSA ket nung additional fund mali, ta paisa ashi.
RMSA state mission office-ia tesayurtem dang mapa shitak inyaktsü sangdong ka agütsüogo saka tashi mangar. Anungji tesayurtemi tang latettsüba itasen agizükba mesüra magizükba osang pei pei DEO dangi tsüngdong oa ashitsü mepishir, ta Menukhol-isa sangdong nung metetdaktsü.