Kerala nung ‘Rat Fever’ ajanga nisung 12 süogo

Thiruvananthapuram, Rongjui (September) 3 (Agencies): Kerala nung August ita tetenzük nungi tang tashi nung nisung 12 tashi tzü agi menatepba tashidak ‘leptospirosis’ agi shiranga süogo.
Leptospirosis dang ‘rat fever’ ta ajar aser Kerala nung taküm January nungi July ita tsüngda nisung 28 tashi iba tashidak agi shiranga süogo. Ajisüaka, August 8 nungi Kerala nung tzümetsüng timtem tulu ajuruba sülen iba shirang kanga bulua adok.
August ita nungi nisung 372 dak iba shirang putet aser nisung 54 iba tashidak agi shiranga asü südi ta temulung melemi bilemer.
Health Minister KK Shailaja-i Deobarnü nübortem dang maoksatsü atema metetdaktsüogo.
Tzümetsüng agi kongshia aliba tesemtem nung alirtemi kümdangtsü atema paisa ashi aser sorkar mozükitem nung iba tashidak menatepa maotsü atema antibiotic, doxycycline ama mozütem agütsüdar ta paisa shisem.
Leptospirosis shirang teimba putetbaji Kozhikode tesem nungi lir. Iba jagi Kozhikode Medical College hospital nung special isolation ward ka lapokogo.
Leptospirosis ya tzü ajanga menatepba tashidak ka lir aser iba ya shiruru indang natzü ajanga belenshir.