Tebilemtsü khuret angatetba tesayurtem nüngdaker

Nagaland nung RMSA tesayur telok kati sorkar nem takhangba agüja lungkak aitba mapang ka nung tanü India ajungalen Teachers Day amunger. Shitakba agibo tanü ya nisungtem aser talisa kaketshirtemi tesayurtem nem tetushi agüja amungba anogo ka lir saka Nagaland nung tesayur karbo iba tetushiji mongui parnok anogomung süitsü. Nagaland nung tesayurtemi lungkak aitba ya tang tasen masü saka küm aika tesayur telok balalai parnok khurettem aser taginübatem atema lungkak aityonga arur. Asenoki reprangdangra, Naga nungertemi sorkar school nung tesayur mapa inyaktsü kanga jangrar aser iba mapa bushir. Ya kechiba ta süra, nisung aikati kanga mebelemi aser ayongayonga itasen tajung agia linüba atema lir. Hao, tangatetba shitak nung tesayur inyaktsü jangrartem aser teinyakdak purtema aika lir, saka ano aikati tesayur indang tebilemtsü khuret mangateti inyaker. Minister, MLA, sorkar ketdangser mesüra yimten lennirtemi chit zülutsüba ajanga mapa anguba tesayur aika lir aser asenoki school tem nung asüngdanga ora, item tesayur aika school-i maruba, pei arunüdang aruba aser aruyonga zübazüba dang sayuba osangtem angashitsü. Nagaland nung sorkar school nung tesayur inyaktsüba ta süra, nisung aikati tenük amor dang mapa inyaktsü tenzüker aser iba jagi tarutsü nung parnoki timtemtema ajuruba asenoki angur. Nagaland state sorkar kübok shimba tesayurtem toktsür Nagaland nung Rashtriya Madhyamik Shiksha Abhiyan (RMSA) aser Sarva Shiksha Abhiyan (SSA) kübok tesayurtem shima mapa inyaker. Tang RMSA tesayur telok kati lungkak aita aruba mapang state sorkar tenüng nung ketdangsertemi iba osang jangjashitsüba nung RMSA tesayurtemji contractual basis nung shimoker aser ita ka jelia parnok mapa tembangba osang metetdaktsütsü akok ta shiogo. RMSA tesayur indang kümsükji RMSA scheme den külemi tembangtsü lateta lir ta sorkarisa metetdaktsüogo. Süra, tang lungkak aitba tesayurtemi parnok mapa inyaktsü tenangzüktep agidang item telatetbaji lia sign sür alitsü, anungji okadak ken o benoka toktepra parnoksa akoksar anentsü südi. Ano külen, Sarva Shiksha Abhiyan (SSA) aser Rashtriya Madhyamik Shiksha Abhiyan (RMSA) ta aliba ka küma lokteper ‘Samagra Shiksha Abhiyan’ ta ajaba Centre-i metetdaktsüogo, anungji SSA aser RMSA tesayurtem ajak Centre sorkari latetba ozüng ajanga alenbanger asütsü. Anungji, RMSA aser SSA kübok shimba tesayurtemi tanga onüktem atema masü saka sorkar dang mapang shitak nung itasen tagütsütsü tim agüjang ta ang takhangba agütsüba tajungba asütsü. Iba nung state sorkari parnok lemzükba shilem sen agütsüba dak alaka tanga mapa balaka inyaktsü mali ama ajiteter. Tesayur ka indang teinyaktsüji school nung kaketshirtem nem kaket shisatsü shitak agüja parnok anitettsü atema lir. Nagaland sorkar kübok mesüra SSA mesüra RMSA mesüra tanga scheme ka kübok shimba-a süang, naji tesayur ka lir. Anungji, nai tesayur indang tebilemtsü khuret angateta inyaktsüla aser kaketshirtemi tim lenmang nung anitettsü meranga sayutsüla. Takhangba agüja school-i moi lungkak aitba ajanga kaketshir aika takoksa ngudar ta tesayurtemi angatettsüla. Ano, tanü-asüng Naga nunger aika nija school tem nung tesayur inyaker. Sorkar mapa angutsü kanga tasak aküm nung, nisung aikati itasen tila asü yonga kecha masü ta ser nija school tem nung tesayur inyaker. Nija school tem nung tesayur aikati kanga dang bendanga agüja kaketshirtem anitettsü meranger aser ibaji HSLC aser HSSLC results ajanga kuli agütsür. Saka, ano nija school nung tesayur aikati parnok den tuition agiba kaketshirtem nem ang marks tajungba agütsüba mesüra pass südaktsüba osangtem angazüker. Iba tangatetbaji khenyongi tai aser meshidak lir, anungji tesayur kati kaketshirtem tebendang melii sayutsüla aser anepalutsü tim. Tesayur mapa ya kanga dang tasak aser tongtipang lir aser tesayur tajungtem aliba loktiliba aser linüktem tejakleni aoba asenok tenük agi angur. Alima nung Finland aser Singapore linüktem nung tesayur mapa ya kanga dang temaba jenjang nung ayur aser nübo tajungtemi dang iba mapa inyaker. Iba jagi linük ana nung world-class education system amenteta lir aser iba ajanga rongsenkettsüng aser lokti kanga renloka aoer.  Quality education aliba ajanga dang nübortem, loktiliba aser linük ka tejakleni aoer aser renloker, aser iba ya tesayurtemi dang agütsütet. Anungji, tanü linük nung tesayurtem tushia amungba anogo nung Nagaland nung tesayurtemia tesüiba nung inyaka aruba meyipa reprangshitsü aser tesayur ka indang tebilemtsü khuret tali angateta, tarutsü nung asen lima tejakleni anir aotsü aser renloktsü atema nisungtem anitetang ta ayongzüker.