Yipru tesashi agi Japan nung kongshiogo; nisung trok asü

Osaka, Rongjui/Sept. 04 : Japan anülulen Osaka tesem nung Rongjui/September 04, 2018 nü Typhoon Jebi arur tangokba noksa nung angur.

Tokyo, Rongjui/Sept. 04 (Agencies): Küm 25 nung typhoon yipru tesashitiba agi Japan linük nung kongshiogo, aser iba yipru ajanga tajemba agi nisung trok taküm samatsü aser nisung 160 yirutsü.
Typhoon Jebi yagi anülulen tsütsü kongshia tzünglu tesashi aruba den külemi mopung ghonda ka nung kilometer 172 tashi keraa aon.
Osaka Bay nungbo iba yipru tesashi ajanga rong tulu ka apu nung bener arua mükeploktsü aser Kyoto nung railway station indang kilem chirepa liasü.
Tzüsem tulu, tzümetsüng aser anentsü alutsü südi ta temulung melemi aliba tensa ka nung ketdangsürtemi nisung million ka dak tali dang parnok aliba ki yutsür aotsü shiogo.
Iba yipru tesashi ajanga nisung meyerijang aika power mali aser ketdangsürtemi nüburtem dang tanga tesemleni aotsü ajungshir.
Iba yipru ya Shikoku asetkong nung Sangtennü teroto meta kongshi aser Japan asetkong tuluba, Honshu tsütsüi ao.
Iba yirpu ya north tsütsüi aoba mapang tashi tajemba akümtsü südi, ta imla lir.
1993 küm typhoon tesashi kati Japan indang asetkong ka nung kongshia nisung 48 asü mesüra samatsüba sülen Jebi ya typhoon tesashitiba ta tzüngsang mopung dakzürtemi shia liasü.
Typhoon Jebi ajanga tayimtsü, train aser rong noklan aika athitsüsa aküm.
Tzümetsüng agi Osaka nung aliba Kansai International Airport indang runways metsüngbang. Iba asetkong ya nisungi yangluba lir.
Osaka anasa kangadang nüngtugu amusement park, Universal Studio Japan ya shibang.
Japang Ato Kilonser Shinzo Abe-i ajungben senden ka jazük aser nüburtem dang pei taküm kümzüka ayutsü ajungshi aser tekeraba nung renemer tanga tesemi aitsü metetdaktsü.
Video nung iba yipru ajanga alinük nung kongshiba sayuba nung tzüsem tulu arua tzükum nung kongshiba nguogo.
Japan indang weather agency ajanga nüburtem dang Typhoon Jebi agi kongshir aliba tesemtem nung anentsüh alutsü, tzümetsüng adoka mopung tesashi aonba den külemi tsüngi aser tornadoes agi kongshitsü südi, ta metetdaktsüogo.
Japan nung teti yipru tesashi agi kongshir aser takümsa tali liasü.
Chiteni/July nunga anentsüh aser tzümetsüng ajanga nisung 200 dak tali taküm samatsü aser iba sülen nisung asütsüsa mopung tatsük ona liasü.