South Kolkata nung apu ka chirep; nisung aser gari sabanga lir

Kolkata, Rongjui/September 4 (Agencies): Tanü nikongtsütsü south Kolkata nung apu ka tesadang chirepba sülen nisung aika sabanga alitsü ta tsübua bilemer, ta ketdangsertemi metetdaktsü.
Diamond Harbour Road nung aliba Majerhat apu Sangtennü nikongtsütsü 4:45 shi nung chirep. Apu teyonglen chirepba aluba sülen gari ishika, two-wheelers aser bus ka apu den külemi alu. Ketdangsertemi tang tashi nung gari kwi aser nisung kwi iba apu agi nembanga ali ajibo mejangja.
“Ni police dang osang tejangja agütsütsü asoshi asüngdangogo. Ni idak nungi tensa jung junga asadangdar. Onoki tamasa nisungtem kümzüka relief agütsütsü nüngdaker. Onoki iba apu kodaser chirep aji asadangtsü,” ta West Bengal chief minister Mamata Banerjee-i ashi, shiba tang Darjeeling nung lir.
Kolkata Police commissioner Rajeev Kumar densema tongtibang ketdangsertem iba tesemi aritepaogo.
“Apu chirepba mapang kü gari apu nung liasü . Kü indang driver-i brake pur kü dang gari nungi alutsü asoshi ashi. Ni gari nungi aluba mapang nung apu ajak anokzüa liasü. Iba tesem nung mapa inyaka alirtemi nisung pongubo kümzükogo,” ta tenük kuli agütsür Sishir Chakraborty-i ashi.
“Rail lenmang tekolak nung aliba apu chirep asübo lendong tuluba adoker lila, kechiyong iba anasa high tension wires mesanga lir,” ta paisa ashi.
Kolkata nung tatembangsa 2016 Metsüremi/March 31 nü apu ka chirepa lir. Burrabazar nung apu teyangludak ka feet 500 shi chirepba sülen nisung 27 asü aser nisung 80 shi yiru.
Maneni 2013 Metsüremi 3 nü Kolkata kübok VIP Road aser E M Bypass sendaktepdaktsüba flyover ka chirep. Iba tatalokba ya ayaterem nung atalok aser iba ajanga lendong kanga tulubo matalok.