PM, Gov aser CM temi Teachers’ Day salem abener

Dimapur, Rongjui (September) 4 (TYO): Teachers’ Day tenüng nung Dr. Sarvepalli Radhakrishnan nem tetushi agütsür, ta Prime Minister Narendra Modi-i metetdaktsü.
Iba anogo nung tesayurtemi asenok maneni len anitsü aser asen linük atema tarutsü yangertsü ayongzüker, ta Modi-isa ashi.
Nagaland Governor P.B. Acharya-ia Nagaland state nung tesayur ajak dangi Teachers’ Day salem osang metetdaktsü.
Iba anogo nung asenoki asen tesayur ajak nem tetushi agütsüdi. Linük nung senso tajung ka ka akümtsü atema tesayurtemi kaketshirtem aniteter, ta paisa ashi.
Nagaland nung alir ajak tenüng nung ni tesayurtem nem tetushi agütsür aser bendanga agüja lanurtem anitetba atema pelaba metetdaktsür, ta Governor Acharya-isa ashi.
Nagaland Chief Minister, Neiphiu Rio-ia sangdong ka nung Teacher’s Day salem metetdaktsü.
Asen taoba tir Dr. Sarvapalli Radhakrishnan asoba anogo nüngtem nung asenok pa nem tetushi agüja Teachers Day amunger. Pa ya shisashir, ketdangser aser lennir ka dang masü saka tesayur ka liasü, ta Rio-i ashi.
1962 küm pa Tir akümba sülen kaketshirtemi pa dang September 5 nü pa tasoba anogo benjung amungtsü atea asüngdang. Idangji pai September 5 nung pa tasoba anogo masü saka Teachers’ Day amung nung ajungtsü ta langzü aser 1962 nungi September 5 nü linük ajungalen tesayurtem anogo mungyonga arur, ta chief minister-isa shisem.
Tesayurtem ya kaketshir meyirjang aika len anirtem lir aser kaketshirtem ya loktiliba yangertem lir. Nisung taküm aika melenshitsüba tesayurtem bilemteter aser parnok ajanga kaketshir aika linük nung senso tajung ka ka kümogo, ta Rio-isa metetdaktsü.
Asen state nung tesayurtemi kaketshirtem anitettsü atema bendanga agüja inyaker. Government School aser Private School tesayurtemi tongti shilem agir aser khenkhenbo tesayurtemi alima rongsen aser teyari kang nüngdak ama bilemer, saka kaketshirtem aser tsüraburtemi moatsübaji tanga ajak dang nungi tematiba lir, ta paisa ashi.