BSF-Pak Rangers senden Sept. 9 nungi tenzüktsü

New Delhi, September 06 (Agencies): September 9 nungi tenzüka anogo pongunü India-Pakistan DG level senden amentsü aser iba senden nung Jammu & Kashmir ceasefire temzüng alema inyakba, sniper temi amakba, litsü telungi aitba, Kutch nung Rann telungi sepai aitba densema India-i onük aika süoka jembitsü imlar.
September 8 nü Pakistan Rangers director general (Punjab) Maj Gen Umar Farooq Burki-i anir parnok 16 Punjab adena Attari-Wagah arrtsüi arutsü, iba sülen parnok Amritsar nungi tayimtsü ajanga Delhi-i arua Border Security Force den September 9 nungi 13 nü tashi senden amentsü, ta ketdangsertemi ashi.
India tsütsülen nungia BSF tongti, Devendra Kumar Pathak lenisüba nung iba senden nung shilem agitsü.
India tsütsülen nungi tongtibangtiba onükji- Pakistan sepaitemi Jammu & Kashmir International arrtsülen ceasefire temzüng alema inyakba ajanga sepai aser nübur aika taküm samaba onük asütsü, ta ketdangsertemisa ashi.
Iba dak alia India tsütsülen nungisa, Gujarat, Kutch kübok Rann, ‘Harami Nallah’ tesemlen temzüng alema senzüba aser shibelenba onük aser arrtsü anüker sepaitem dak Pakistan sniper temi akahba onük-a süoka jembitsü tebilemba lir.
Taoba ita linük ana tsüngda NSA senden amentsü sentong Pakistan-i thinenja liasü, ajisüaka DG-level senden amentsü osangbo parnoki jangjatsüogo.