Joko India nung kasa o kasa shi nung medemba ya ozüng alema masü

New Delhi, Rongjui/September 06 (Agencies): Taintem rongnung tetsür o tetsür na, aser tebur o tebur na shi nung medemba ya joko India nung ozüng alema masü, ta tanü Supreme Court-i obendang agutsüogo.
Indian Penal Code (IPC) kübok Arrla 377 agiena Supreme Court Chief Justice, Dipak Misra-i, “Shi nung medemba yimya balala anemba ya fundamental rights anema lir,” ta shia, taintem rongnung tangatettep nung kasa tetsür o tetsür mesüra tebur o tebur na shi nung medemba ya ozüng alema masü, ta ashi.
Obendang temeja pezü agüja Supreme Court nung judge pezüi akumba bench-i, iba Arrla ajanga tangatettep nung medemba mesüra tangatettep makai memelungi medemba na mebendanger, ta ashi.
Ajisüaka Arrla 377 kübok nisungi shiruru den medembabo ozüng alema asütsü.
Chief Justice Misra-isa, “Iba (Arrla 377) ya LGBT pur atema amokmeren ka kümogo parnok bendangshidanga amshitsü atema hadir ka lir,” ta ashi.
IPC kübok Arrla 377 ajanga tain rongnung tangatettep nung kasa tetsür o tetsür na, aser tebur o tebur na shi nung mendemba ya ozüng alema liasü, aser iba ozüng nung aibelenertem taküm piyong tepoukdak ayutsü mesüra senchi-a achitsü shia liasü.
2009 küm Delhi high court-ibo iba yimya nung shi nung medemba ya ozüng alema masü, ta obendang agüja liasü saka küm pezü lir sülen Supreme Court-i iba obendangji agienja, Parliament-i dang ozüngtem melenshitsü akok, ta ashi.
Ajisüaka 2016 küm LGBT (shi nung kasa o kasa na medemba telok) nungi züngsem pongui temepishiba ken o ka angadangtsü benok, aser Supreme Court-i melung.
Temepishiba agütsür ponguji- Bharatnatyam dancer Navtej Johar, sobaliba nung mongin, Aman Nath, restaurateurs Ritu Dalmia aser Ayesha Kapur na aser Sunil Mehra nunger liasü.
Iba sülen iba temepishiba ken o angadangtsü atema Supreme Court-i judge pongui akumba bench ka tenteta taküm Chiteni/July ita nung iba ken o angadang.
Iba ken o angadangba mapang nung Centre nung BJP-i aniba NDA sorkari iba ken o nung tiyongtsüi maittsü lemteta Court nem nungloktsü, ajisüaka kinünger tsüngda shi nung medembabo nokdangtsü metetdakja liasü.