‘Dalit’ ta amshiba nung kecha tai mali

Taoba hopta Union Information and Broadcasting Ministry-i media dang ‘Dalit’ olung mamshitsü atema tetuyuba ka agütsüogo. Scheduled Castes nung züngsemtem dang ‘Dalit’ nunger ta amshitsü nüngdak madoker aser iba olung ya mebilemdangi amshir ta I&B Ministry-i metetdakja liasü. Iba tetuyuba ya Bombay High Court nung Nagpur Bench-i ashiba nung ajemdaker agütsü, saka June 6, 2018 nü okadak iba ken o atema jembiba sülen parnoki Centre dang ‘iba ama tetuyuba ka media nem agütsütsü atema bilemdangang aser iba asoshi telemtetba ka agiang’ ta dang shia lir. Ajisüaka, okadaki iba olen amshitsü memulunger ta metetdaktsü. Union Ministry of Social Justice and Empowerment dangi iba ken o abenba sülen parnoki official maparen ajak nung Dalit nunger ta masü saka ‘Scheduled Castes’ ta dang amshitsü atema tetuyuba agütsü. I&B Ministry-i tetuyuba agütsüba nung ‘official’ maparen ajak nung ‘Dalit’ olen mamshitsü atema shia lir, saka media-i ‘Dalit’ ta amshibaji official nung masü saka tangatetba balaka nung amshir. Anungji, I&B Ministry-i media nem iba tetuyuba agütsüba meyipa agitsüla. Scheduled Castes züngsemtem dang ‘Dalit’ nunger ta mamshitsü atema o atsütepba ya tang tasen masü, saka iba ya ken o ya tejen lir. Küm 10 shi tejakdang National Commission for Scheduled Castes-ia ‘Dalit’ ta asüba ya temzüng den meputep ta shia liasü. Linük Temzüng nung Arrla 341 kübok züluoka aliba caste nung züngsemtem dang ‘Scheduled Caste’ züngsemtem ta ajatsü jenjang agüja lir, anungji Dalit nunger ta mesüi parnok dang ‘Scheduled Caste’ züngsemtem ta ajatsüla ta NCSC-i iba mapang shia liasü.  Ajisüaka, media aser non-official maparen nung ‘Dalit’ ta amshiba olen ya Dalit nungeri parnok sasa jatetba aser amshiba olen ka lir. Anungji iba nung Centre-i tai aputsü mesüra tamshi ta ashitsü temeten mali. Parnok sasa parnokj Dalit nunger ta ajar aser züngshir nung aser iba jagi parnok dang Dalit nunger ta ajaba nung Centre-i tebang maitsüla. Dalit ta asüba olung ya mapangtem süia arudang pei sasa akhümtsübuba, Dalit nunger ta nangzükshiba, pusemba aser kin ajemreptsü merangba anema noktakba tangatetba balala nung benshia arur. Tesüiba mapang Dalit nunger ya ‘untouchables’, tetezü India nung teküpoktiba jenjang nung alirtem ta züngshi, ajisüaka British nunger yimsüsüba mapang parnok dang ‘depressed classes’ ta aja. Ano, Mahatma Gandhi-ibo loktiliba nung kin mesüra telok bendanga amshiba tangatetba agientsü atema parnok dang ‘Harijans’ (tsüngrem chirtem) ta aja. Ajisüaka , liyonga arudang Dalit nungertemi item nüngjatem magizük aser parnok sasa parnok Dalit nunger ta ajatsü lemteta amshiyonga arur. Parnoki parnok ‘Dalit’ nunger ta aja aser iba tetezü ya ‘tashi alirtemi ajemrepba ayurtem’ mesüra ‘tashiyim agi timtemdaktsürtem’ ta asüba lir. Iba olung nung tetezü keta lir aser ibaji iba teloki parnok maitsü jangjashiba aser küm noklang aika parnok nem magütsüi aruba temetentem meshia noktakba lir. Parnok sasa ‘Dalit’ ta ajaba nung parnoki pei taküm len ania aoba, alizüngtem ayuba aser tangatetba tajung nung parnok asoshi telemtetbatem agiba dena lir ta Centre sorkari angatettsüla. Anungji Centre sorkar-i media dang dang masü saka shinga danga Dalit nunger ta mamshitsü atema tetuyuba magütsütsüla.