Advisor Zale-i KSCJ kaketshirtem ajungshi

Kohima, Rongjui/September 06 (TYO): Youth Resources and Sports, Advisor Zale Neikha-i tanü Nagaland nung educated youth tem dang state nung mapa dak dang temulung magütsüi Nagaland adena orr bendang lima nung dena Naga nunger tangar dang nungi tekübokba masü ta sayutsü ajungshi
Kohima Science College (Autonomous) Jotsoma nung 57buba Fresher’s Social cum Charity Concert sentong nung jembidang nüngtugu olong “survival of the fittest” ateshia Zale-i tanü lima nung iba olong ya alimar yimya dak dang masü saka meimchirtem dak kanga tapet lir, ta ashi. “Tangar dang nungi tajungba akümtsü atema asenok tsüngda tokteptsüsa akümer, anungji lokti nung na tangari meteta kümdaktsünüra külem medemer dang nungi nai tajungba inyaktsü nüngdaker. Anungji nisung ka dak tetoktepba shisatsü alitsüla,” ta pai ashi
Sorkar mapa angutsü tasak ta shia, pai kaketshir kati meranga meinyakra government sector nung mapa mangutsü, ta ashi.
Ajisüaka paisa kaketshisatsü rizünga ayubaji sorkar mapa angutsü asoshi dang masü saka kaketshisatsü teperi ngur aliba nisung kati pei sempet bushitettsüla aser kodang parnok pei sempet bushitetdir parnok mapa meinyaki malitsü, ta ashi.
Iba dak sendakba nung pai lanurtem dang state sasep nung dang masü saka state adena orr bendang lima nung dena Naga nungertem ya tangar dang nungi tekübokba jenjang nung masü ta sayutsü ajungshi.
Tanü asüng putu nung shisatsü angutsü asoshi tenüngdakba facilities ajak teperi lir ta shia pai, “Technology nü kapuma nung lir, ‘click’ mesera ‘screen nung khen anemba’ ajanga nai metetnüba ajak agütsür,” ta ashi. Paisa item facility tem amshiyim shidak amshitsü aser kodanga mashiyimi mamshitsü tekümdangtsü ashi.
Iba college alumnus ka ama pai HSSLC Examination 2018 tatidang nung kaketshirtemi takok tajung ngua iba college nung arua züngoksemba atema parnok tenüng asang.
Tanüasüng lokti nung kaket shisatsüji kanga tongtibang ta shia pai kaketshirtem dang kaketshisatsü bushiba nung temulung agüja azüngtsü ajungshi. Tanü putu nung lenla ajak nung tetoktepba dang aser talisa kaketshisatsü bushiba nung tokteper. “Nenoki nenok ya Nagaland nung nüngtugutiba Government College nung azünger ta tamadok,” ta shia pai kaketshir ajaki parnok azüngba mapang nung KSCJ tenüng memenüktsütsü imlaba lemsatep.