Kiphire atema Mkg nung kentenertem longjemer

Dimapur, Rongjui/Sept. 06 (TYO): Mokokchung jila nung alir kentenertemi “Mokokchung sings for Kiphire” omen nung ajemdaker Rongjui/September 08 aonung Town Hall nung kenten sentong ka ayongzüktsü.
Iba sentong nung aruba sen ajak Kiphire district administration nem tim lenmang nungi agütsütsü, ta iba teyari kenten sentong ayongba telok, Mokokchung District Musicians Association (MDMA) tir, Arsashi Ozukum-i ashi.
Iba sentong nung tanga tesemtem nungi kentenertemi arua shilem agitsü mulunga lir, ta paisa ashi.
Iba kenten sentong ya Mokokchung nung nüburtem ajungai tangatetba nung ayogzüker, kechiaser iba sentong takok ngua agitettsü mechi lokti aser kaketshir telok balalai shilem tajung agia achaayanger, ta MDMA assistant general secretary Arenlong Jamir-ia shisem.
Kiphire district nung akimar tzü mopung lendong agi kongshir alirtem nem teyari agütsütsü asoshi iba ama sentong ayongzükba atema ADC, Manpai Phom-i MDMA dang pelaba lemsatep.
Manpai-isa Mokokchung nung nüburtem dang iba sentong nung arua shilem tajung agia Kiphire district nung aliba nüburtem yaritsü ajungshi.