Kohima nung NPC-i ayongzüka 53buba Peace Day among

Kohima, Rongjui/September 06 (TYO): Tanü Nagaland Peace Centre (NPC)-i NSCN(K)-i India sorkar den ceasefire agienba atema tebilemtsü kaa jembiogo, ta ketdangsertem osang ka ajanga metetdaktsü.
Kohima nung aliba The Heritage, Old DC Bungalow nung 53buba Peace (Ceasefire) Day anogomong nung Thanksgiving Service agidang NPC Chairman, N Theyo-i, state nung küm aika raraba aser azüdokshiba sülen 1964 küm Rongjui/September 6 nü taoba mapang Federal Government of Nagaland aser Government of India na tsüngda ceasefire tezüngzüktep nung sign asüba bilemteta jembi. Iba mapatong ya Peace Mission ajanga achaayanga inyak, aser iba mission nung Jayaprakash Narayan, Nagaland Peace Centre, Kohima tentetsang, Rev. Michel Scott the Englishman, taoba mapang Assam Chief Minister, B.P, Chaliha aser Nagaland Baptist Church Council nungi lenir 18 densema liasü, aser parnok rongnung Rev V K Nuh dang tanü tashi arishia lir, ta pai ashi.
Tesasaba olen ka nung pai, “Ajisüaka ken o jembiba amajok asübaji kanga tia maka aser tsükchitep den azüdokshiba asentenshi,” ta ashi.
Ajisüaka Theyo-isa, tesüiba küm ishika yimjung maparen atema inyakba nung terenlok lir aser Nagaland tesempatsü putiotsü mapang süir yimjung angatetdar, ta ashi.
GoI aser NSCN (IM) na tsüngda Luroi/August 1, 1997 nung ceasefire sign asü aser NSCN(K) den April 2, 2001 nung sign asü, saka tia makai S.S Khaplang leniba nung NSCN(K)-i ceasefire agien aser security sepaitem amakba aser tepsetba nung shilem agi, ta pai ashi.
Pai ashiba agi, NPC-i iba tensa atema tebilemtsü akar aser parnok maneni pei taküm atema jenshiba atema kanga mepelar.
“Onoki NSCN(K) nungi lenirtem dang ceasefire yanglutsü aser tangatetba nung India sorkar den ken o jembitsü mepishir,” ta NPC Chairman-i ashi.
NPC-isa ajak dang yimjung alitsü atema yimtenren tashi itdaktsütsü aser Naga yimtenren ken o tatembangsa latettsü atema sarasademtsü ayongzüker, ta pai ashi.
NPC nükjidongji yimjung aser tangatetba tanela alitsü atema lir, saka rara den azüdokshi anema nokdaker, ta shia pai, “India sorkar den ken o jembiba Naga yimtenren teloktem den state sorkari yimjung atema mapatong inyakbaji onoki nungiter,” ta ashi.
Paisa, asen lima nung yimjung alitsü atema inyakba atema FNR, Arogo lenirtem aser melungtet teloktem dang pelar aser nungiter, ta ashi.
Iba anogomong nung NPC chairman-isa, Pandit Jawarharlal Nehru, Lai Bahadur Sastri, Indira Gandhi, Deva Gawda, P.V. Narasimha Rao, Atal Bihari Vajpayee aser tang teinyakdak Ato kilonser, Narendra Modi nunger ama India lenirtem ajanga Naga nunger anema mitkar tashi amshiba melenshia Naga yimtenren tebilemtsü onük atema yimjung nung yimtenren ken o jembiba ajanga latettsüsa lenmang bushitet, ta ashi.
“India ya linük tuluka lir aser parnoki o sadema jembitsü aser yimtenren ken o jembiba den yimjung terenlok atema Naga nunger nem maongka agutsü,” ta pai ashi.
Kasa sentong nung taoba mapang NBCC peace mission lenirtem rongnung tanü tashi arishia alisang, Rev Dr V K Nuh-i Peace Day bilemteta jembidang pai, 1964 küm sülen asortemi iba atema tebilemtsü makar aser parnok atema putiotsü nung ajangzükbaji kecha tetezü maket, ta ashi.
Iba dak sendakba nung pai, putiotsüji lanurtem dang ashitsüla aser iba anogomong bilemetdaktsütsüla, ta ashi.
Paisa, ceasefire agreement sign asüba sülen, taoba mapang state sorkari September 6 anogoji Peace Day ta amongtsü lemtet, saka yamaji meinyaker, ta ashi.
“Asenoki Peace Day ji mamatoktsüla, saka asen lima nung yimjung bener aruba atema Tsüngrem dang pelatsüla aser rara aser azüdokshi malitsüla,” ta ashi.
Iba anogomong nung tenüngsang agutsüba sarasadem agi aser Peace Mission züngsemtem den NBCC nungi lenir 18-i Nagaland nung yimjung alitsü atema inyakba atema parnok bilemteta liasü. G Gangmei leniba nung langzütepa lai azüng aser tenüngsang agüja sarasadem; Rev Dr Neikielhoulie Angami DD-i tetenzük sarasadem aser Rev Dr V K Nuh-i tatembang sarasadem agia liasü.
Sentong nungsa Music Director CBC Kitsubozou, Vesato Thuluo, leniba nung choir-i ken ajanga osang aben.