Pakistan sorkar aser mitkartemi India den ken o jembiner

Islamabad/New Delhi, Rongjui/September 07 (Agencies): Pakistan nung tongti ketdangser kati, Pakistan sorkar aser military wing-i India den ken o jembitsü melunga dang lir, ta metetdaktsü.
Pakistan nung Information Minister, Fawad Chaudhry-i, “Pakistan-i India den ken o jembitsü melunga lir,” ta ashi.
Region nung yimjung alitsü atema Pakistan sorkar aser military-i India den ken o jembitsü melunga lir, ta Fawad Chaudhry-i ashi.
BBC Urdu den interview ka agidang Minister-i, Pakistan-i ken o jembitsü melunga lir, ajisüaka India tsütsülen nungi telangzüba mali, ta ashi.
“Iba dak sendakba nung (Ato kilonser) Imran Khan-i India dang olen aika shiogo,” ta Minister, Chaudhry-i ashi.
Paisa, “Pa Ato kilonser shimliyongi Imran (Khan)-i India nungi cricket asayartem jaoka liasü. Pai mezüngbuba onük jembidang pai, New Delhi-i mera tajung ka ka agia inyakra onoki mera tajung ana agia inyaktsü ta jembiogo,” ta ashi.
Paisa, Imran Khan-i Ato kilonser, Narendra Modi dena jembiogo, ta shisem.
Linük ana tesendaktep tajungba akumtsü aser ken o jembitsü atema sorkar telemtetbaji mitkartemia melunger, ta ashi.
“Khan aser General Qamar Javed Bajwa napronglai, linük ka sendoka lira merenloktsü ta angateta lir,” ta pai ashi.
“Lenir anapronglai region nung yimjung melira terenlok nung atsüngzüktsü ta angateta lir,” ta paisa ashi.
“Sikh nunger temeshi aini aortem atema Pakistan-i kobi melii Kartar Singh arrtsü lapoktsütsü aser visa meliaka Gurdwara Darbar Sahib Kartarpur semdangtsü atema temelaba agutsütsü,” ta paisa metetdaktsü.