Meghalaya cabinet-i tesayur shimtsüba küm atsülangtsü

Shillong, Rongjui/September 7 (Agencies): Meghalaya cabinet-i Rogonü, state education department-i primary school nungi college tashi nung tesayurtem shimba küm 27 tashi aliba nung 32 tashi ajungkettsütsü asoshi benokba agizükogo.
Iba telemtetba agiba sülen upper age limit ya küm 37 asütsü kechiyong ST candidate tem atema küm pongu talila bendenloktsür.
Tang tashi nung upper age limit-i küm 27 lir aser küm pongu bendenloktsüba sülen küm 32 tashi mapa nung apply asütsü asoshi maongka agütsür.
Meghalaya education minister Lahkmen Rymbui-i, iba ya telemtetba tongtibang ka lir, ta chief minister Conrad K Sangma lenisüba kübok cabinet senden akaba sülen ashi.
Rymbui-isa, iba telemtetba ajanga tesayur akümtsü asoshi qualification talila nüngdakba purtem atema maongka agütsütsü, ta ashi.
“Tesayur ka akümtsü atema qualification talila nüngdaker. Taoba mapang nungbo bachelor degree anguba teperi liasü, ajisüaka tangbo secondary schools atema bachelor degree den bachelor of education (B Ed) nungdaker aser higher secondary schools tem atema postgraduate den B Ed degree nüngdaker. Iba telemtetba agiba onük tongtibangtibaji state nung education system jenjang tajungba kümdaktsütsü asoshi lir,” ta Rymbui-i ashi.
“State nung qualified tesayurtem timba aniokba ajanga kaketshirtem nem education tajungba agütsütsü. Iba dak rangloker onoki upper age limit melenshitsütsü asoshi telemtetba agi, kechiyong qualified tesayur timba kümra education jenjang tajungba akümtsü,” ta pisa ashi.
“Nisung aika post graduation mesera doctorate renemer alirtem aika asenoki magishi kechiyong parnok renemba mapang tashi nungbo tesayur atema apply mesütettsüsa kümadok,” ta Rymbui-isa maneni shisem.