Totzü jenjang atuba anema linük tesem ajaklen longkak aittsü

New Delhi, Rongjui/September 07 (Agencies): India linük nung petrol aser diesel totzü jenjang tanen makai tudar aser tanüa totzü anaprong nung jenjang tuogo.
Tesüiba ita ka tsüngda diesel totzü litre ka nung sen 4 jungnüa tuogo aser petrol litre ka nung sen 3 jungnüa tuogo.
Tanü totzü jenjang poisa 50 jungnüa atuba sülen Delhi nung petrol litre ka nung sen 79.99, Mumbai nung sen 87.39, Chennai nung sen 83.13 aser Kolkata nung sen 82.88 kümogo.
Iba dak sendakba nung Congress aser Left party temi linük tesem ajungalen longkak aittsü, ta sangdongogo. Congress-i Rongjui 10, 2018 nü Bharat bandh ayongzüker aser kasa anogo nung Left party temia longkak aittsü.
Ato kilonser, Narendra Modi-i aniba sorkar aija tanü Congress Party-i, osettsüset aser aonsotsü nung jenjang tang timba tuogo, ajisüaka Union Finance Minister-i nüburtem dang ibaji ajanga maoksatsü ajungshir, ta aitsü.
“Khuret abenba opposition ka ama Congress-i nüburtem asoshi ola adoker. Totzü tazü nung jenjang ajemba nung ajemdaker sorkari nüburtem nem tajangzük agüja central excise duty ajemtsüla,” ta Congress lenir aser taoba mapang Union minister, Anand Sharma-i ashi.
Tanü totzü jenjang poisa 50 shi atuba sülen Delhi nung petrol litre ka nung sen 79.99 aser diesel litre ka nung sen 72.07 kümogo.
Taoba ita totzü tazü jenjang atuba aser US sen dollar den medemdangra India nunger sen rupee ano jenjang makaba akumba ajanga tesüiba ita ka shi totzü jenjang kanga tudar.