Bhandari nung tanabuba Measeles & Rubella campaign senden menogo

Wokha, Rongjui/September 07 (TYO): Tanabuba Measles and Rubella awareness campaign tanü Additional Deputy Commissioner, Bhandari’s Conference hall nung Additional Deputy Commissioner Bhandari aser Block task force committee Chairman, Bhandari, Tiameren Chang leniba nung kaogo, ta ketdangsertem osang ka ajanga metetdaktsü.
Okila jembidang pai Task force züngsemtem dang awareness agutsüba nung maneni shilem junga agitsü aser taruba Measles Rubella Vaccination campaign atema sangdongtsü mepishi.
Iba campaign ya Yimpoksüi/October 3 nü Sub-Division nung state tesem ajak den agitsü.
Kasa sentong nung CHC, Bhandari, Dr. Lipokrenla Ao-i züngsemtem dang communication plan nung lateta aliba ama inyaktsü, nübur ajak nem shilem agidaktsütsü aser health workers den amalitepa inyakba ajanga Vaccination Campaign takok angutsü nenshia metetdaktsü.
Iba campaign ajanga arishi ita 9 tanur nungi arishi küm 15 pur tashi ayimjemtsü, ta shia lai tesayurtem, tsüraburtem, Arogo nung lenirtem aser melungtet telok ajakji tongtibang aser awareness agütsütsü atema sabang tajung lir, koba ajanga tanurtem Measles and Rubella tashidak nungi kümzüktsü, ta metetdaktsü.
Iba Campaign senden nung Campaign Committee züngsemtem dak alia Medical department, Sub Division nung department balala nungi tekolakpurtem, kaketshir tentet balala nungi lenirtem, Arogo nung lenirtem, GBS aser Dobashis, tesayurtem aser NGO tem Block Task Force ama aden.