Foothill Road atema sarasademtsü aser tenlatsü ayonger

Dimapur, September 7 (TYO): Ao Baptist Arogo Mungdang (ABAM)-i nübortem dang Nagaland Foothill Road Project yangluba asoshi tenla agütsütsü ayongzüka, Deobar (September 9, 2018) nü Aor arogo ajak nung iba nüngtem nung sarasademtsü aser tenla bendentsü sentong ka renema lir.
Mon nungi Dimapur tsüngda yangluba tenemtsüng lenmang ya pungmang ka nungi asangsang kümdar. Iba mapa ya December 21, 2013 nungi tenzük aser tang tashi nung sen crore 70 endoka mapa inyaka arudar. Iba lenmang nung ano kilometer 8 nung earth cutting mapa anendaka lir aser iba nung sen crore 11.5 shi endoktsü, ta ABAM Executive Secretary, Rev Dr Mar Atsongchanger-i taoba mapang sangdong ka nung metetdakja liasü.
Sorkar schemes aser tanga teloktem dak dang metalokba ajanga iba mapa anendaka ayutsü akok aser asenoki bilemba ama mataloktsü akok. Asenoki nüngdak sen ajakjibo magütsütettsü saka tenemtsüng lenmang yangluba mapa nung asenoki akokba sen tera agütsüba ajanga asenokia iba mapa nung shilem agitetsü akok, ta Rev Mar-isa ashi.
Iba lenmang tembangtsü nüngdak ajiteta aser public-ia yariteptsüla ta angateta 2017 nung ABAM annual council senden amendang taküm Deobar tekülem sentep ka nung tenemtsüng lenmang atema sarasademtsü aser iba mapa asoshi temulunger tenla bendentsü telemtetba agi, ta Executive Secretary-isa metetdaktsü.
Iba bangzüng nung ajemdaker ABAM-i September 9, 2018 nü iba sentep agitsü lemtet aser ibaji calendar nung enok.