Rotary Club, Mkg-i ‘Nation Builder Award agutsü

Mokokchung, Rongjui/September 08 (TYO): Rotary Club of Mokokchung-i ‘Nation Builder Award 2018’ ta sür tesayurtem nem konang agütsüba sentong tajung ka parnok Rotary House nung ayongzüka liogo.
Iba Nation Builder Award ya Rotary India Literacy Mission kübok inyakba mapatong ka lir, aser iba ya tongtibangsa India lima rangben azüngzülu meteta kümdaktsüba den chichiba education agütsütsü nükjidong yur tentetba mapa ka lir, ta angazüker.
Taküm National Builder Award ji Satsüngkala (GPS Arjuma Mokokchung Village), Imtitongzük (GMS Imnatsüngda Longsa Village), Asangla Lkr (GPS Alitongdong Chuchuyimpang), T. Amongla Sayang (GPS Electrical Colony Changtongya Town) aser N. Temjen (GMS Longchara Changtongya Town) par pungui agizüka liasü.
Iba den ano Rotary Club-isa Mkg nung Rotaract Club aliba school nungi Outstanding Teacher Award ta sür sa ka shima agütsür, iba award-ji taküm Edit Douglas Hr. Sec School nungi tesayur Imkongmenla-i agizüka liasü.
Tanü iba award agütsüba sentong nung Mokokchung Addl. D. C Manpai Phom tetushi tesemdanger liasü. Pai iba sentong nung jembidang, azüngzülu percentage teimba kümdaktsübaji tongtibangba masü saka chichiba education koma agütsür ta asübaji tongtibangtiba lir, anungji, iba luyim nungji temulung agütsütsü ajungshia liasü.
Education maparen nung town area nungbo shidi süra nüngdakbatem mesüra timtem ajuruba kangabo mali, saka yimdak yimtsüngtem nungbo school aika temeimtsü tia nung lir, anungji, asenoki itemji senzüka metoktsütsüla, kechiyong lokti ka renloka aotsü asoshi lirumedema aintsübaji kanga tongtibang lir, ta paisa inyakdaktsünüba olen ka ashi.