Swapna-i Kolkota nung ki ka aginüba lemsatep

Rongjui/September 8, 2018 (Agencies): Swapna Barman shiba tawa Asian Games nung India nunger rongnungi heptathlete nung gold medal angur mezüngbuba aküm, lai Rogonü West Bengal sorkari Kolokta yimti nung talidak ki ka atema teyari agütsütsü imlaba lemsatep, kechiyong la permanent address ka mali.
Swapna ya West Bengal kübok Jalpaiguri district nungi lir aser Sports Authority of India (SAI) Eastern Training Centre nung 2012 küm nungi training agia arudar.
“Ni SAI complex (Salt Lake) anasa ki ka aginer. Ni tang SAI complex nung telidak lir, saka ni iba tesem nung shilem magira talidak malitsü. Aji asünung sorkari kü nem teyari agütsüra kanga pelatsü,” ta Swapna-i ashi.
West Bengal Chief Minister Mamata Banerjee-i Swapna nem senpet sen lakh 10 den sorkar mapa ka agütsütsü asoshi nangzükogo.
Taoba boxer Vijender Singh nungi tenzüker India chief athletics coach Bahadur Singh nungeria la nem sen agütsütsü asoshi nangzükogo, saka item senpettem dak sendakba nung lai kecha telangzüba magütsünü.
Games nung Swapna tepu ngua asayaba indang jembidang coach Subhash Sarkar-i ashiba agi, lai iba tekangshi ajak kokteter Asian Games nung takok tajung nguogo.
“La Asian games metenzük tsüngda tekangshi aika ajangogo. Incheon Asian games nung mezüng asayadang nungi tenzüka 2015-16 tashi la teberem nung timtem liasü. 2016 küm mapang ka nungbo lai ajak toktsür kidangi meyipa onüa liasü. Ni la dang maneni training agitsü asoshi ajungshi kechiyong lai medal koktettsü ta ni imlaa,” ta Sarkar-i ashi.
Swapna dak alia gymnasts Pranati Das and Pranati Nayak, rower Sanjukta Dung Dung aser Indian handball goalkeeper Nina Shil nungera Asian Games nung shilem tajung agiba atema SAI Eastern region puri tushia liasü.
Taoba mapang nung Swapna Kolkata airport nung la pusemertem aikati tushia agizükogo. Banner tem nung ‘Golden Girl’ ta zülua amer la tenüng ayima la pusemertemi la agizük.