Dimapur nung Physiotherapist Anogomong among

Dimapur, Rongjui/September 09 (TYO): Küptoknü alima tesem ajak den liromedema Dimapur nunga AIDA hall, Don Bosco Higher Secondary School nung World Physiotherapy Day anogomong mongogo; iba sentong ya Indian Association of Physiotherapists (IAP)-i ayongzüka liasü, ta tanü ketdangsertem osang ka ajanga metetdaktsü.
Iba anogomong sentong nung jembidang Chief Medical Officer, Dimapur, Dr. K Vikato Kinimi-i, physiotherapist tem ya temang normal süa mapa inyakdaktsürtem lir, ta shia physiotherapist tem dang mapa ajema adokba agi melung ajema malitsü saka maneni pei mapa tajung inyaktsü ajungshi.
Paisa physiotherapist tem dang parnok tebitemtsütem benoktsü atema parnoki ajangshiba timtem balala pa nem metetdaktsütsü asüngdang.
Dimapur CMO-isa parnok dang, kobi melii state nung Wellness centre tasen ka amenoktsü, ta metetdaktsü.
Kasa sentong nung Nagaland Post yimobilem zülur, Geoffrey Yaden-i physiotherapist tem dang tesem ka nungi ka ta nüburtem dangi oa parnok tenzüktsü atema asalentong kar yanglua inyaktsü ajungshia liasü.
Paisa, physiotherapist temji shirangba sülen dang masü saka tashidak agi memenepdang temang anema lidaktsütsü atema-a nüngdaker, ta ashi.
Paisa parnok dang mapang shia Dimapur nung camps ayonga akatsü ayongzük.
World Physical Therapy Day ya küm shia Rongjui/September 8 nü amonger, aser iba anogomong nung parnoki nüburtem nem awareness agutsütsü aser parnok inyakyim metetdaktsütsü atema maongka angur.