Loktiliba nung temelenshi atema Arogoi lenitsüla: PB Acharya

Tuensang, Rongjui/September 09 (TYO): Küptoknü/Honibarnü Nagaland Angh, PB Acharya-i Tuensang district semdanga Panchayat Hall nung Tuensang Village Council den senden ka menogo, ta district ketdangsertem osang ka ajanga metetdaktsü.
Iba senden nung pai Council züngsemtem den shisa lemsatepba den külemi tawa alima tzümopung lendong ajanga takoksa angurtem den tejashi lemsatepa liasü.
Angh-i, “India ya takar saka India nungerbo sensaker, aser ibaji loktiliba nung ochimashi aser temenen mapatem mita mereprangba ajanga lir. Terenlok tenüng amer yimtenren lenir kar, melungtet teloktem, contractors aser kija kar dang tajangzük angur, saka loktibo majangzüker,” ta ashi.
Nagaland ya Khristan state ka asüba ya temoatsü, ta shia Angh-i, India nung shisaliok nung samanirtemji Khristian missionary tem lir, ta ashi.
Khristan state ka ama nüburtemi Khristan tangatetba benshitsüla aser ajak kasa züngshitsüla. Arogotem aser shisashirtemi loktiliba nung temelenshi adokdaktsütsü atema lenitsüla,” ta pai ashi.
Pai ashiba agi, alima nung democratic linük tulu rongnung India densema lir, kong nübur telemsa aika longjema liteter.
North Eastern State nung terenlok makaibo India ya terenlok aliba linük ka ta ashitsü makok, ta pai ashi.
Tesasaba olen ka nung pai, “State nung mapa maongka maliba ajanga Naga nunger tazünger aika yimti tulutem aser jilatem nung alir. Kasa sorkar kübok süaka tanga state tembo tejakleni aoer saka asenokbo tang tashi tesülen atsüngzüka aliba ya asenoki shisadangtsüla,” ta ashi.
Tawa alima tzümopung lendong ajanga kongshiba tesemtem semdangtsü atema aodang pai Government Polytechnic semdang aser yangji pai kaketshirtem aser tesayurtem dena shisa lemsatepa liasü.
Pai kaketshirtem dang meranga inyaktsü aser tetoktepba lima ka nung alima koleni aoer, ibaji rajema alitsü ayongzük.
Nikongdang pai Administrative Officers, Security Agency, sorkar ketdangsertem, Tribal lenirtem, Chambers of Commerce, School kaketshirtem aser melungtet teloktem den senden ka ayongzüka amen; iba senden nung pai parnok dang tawa Nagaland nung alima tzümopung lendong ajanga takoksa angurtem yaritsü atema CM Relief Fund nem tenla agutsütsü ayongzük.
Tanünübuba (Rongjui 09, 2018) nung pai Tuensang nung District Jail semdang aser tepoukdak alirtem den jembidang pai parnok dang tepoukdak aliba mapang nung pei taküm jungjunga melenshitsü ajungshia liasü.
Angh-isa parnok nem parnok aibelen apir ita anana atema senotsü agutsü aser amtsük-a lemja liasü.
Angh den District ketdangsertemisa Kohdi children Home aser Bethel children home Tuensang semdangba mapang pai tanurtem dang Tsüngrem tsübutsü aser loktiliba ajungkettsür kaka akumtsü ayongzük.
Nikongdang Angh-i Navinn conference Hall nung Changsao Thangjam Setshang (Chang tetsürtem tentet) den senden ka ayongzüka amen. Iba senden nung Angh-i tetsürtem atema welfare sentong kar metetdaktsü aser Nagaland Armed Police (NAP) nung tetsür ano tali shimoktsü osang metetdakja liasü.
Paisa ‘Beti Bachao, Beti Padhao’ (Jalatam kümzükang, jalatem züngdakjang) onük jembi, aser tetsürtem dang yimtenren nung ajemokba ajanga nübur tangatetba melenshidaktsütsü ayongzük. Angh-isa Changsao Thangjam Setshang nem sen lakh 1 tenla agutsü.
Tatemsa Angh-i Tuensang jila nung aliba Hindu-Muslim nungertem den CKS Hall nung senden ka ayonga amen, ta ketdangsertem osang ajangasa metetdaktsü.