Totzü jenjang tujen atutsü südi

Yashi Congress-i ayongzükba Bharat Bandh nung opposition party teimbakati pusema linük kübok tesem aika nung lungkak aitba sentong takok ngua agiba osang angazüker. India nung petrol, diesel aser LPG jenjang tujen atuba aser tang jenjang tasaktiba akümba anema Congress-i Bharat Bandh sentong agitsü ayongzük, saka parnoki iba lungkak aitba sentong nung temulungertemi dang shilem agitsü ta metetdakja liasü. Congress-i petrol aser diesel ya Goods and Services Tax (GST) kübok dendaktsünür aser iba atema takhangba agütsür, kechiyong GST kübok densemra petrol aser diesel litre nung sen 15 nungi 18 shi ka ajemtsü. Maneni parnokisa totzü nung central excise duty aser state tem nung VAT talila agiba ajemdaktsünür. Tesüiba küm pezü tashi Centre nung NDA sorkari ketdangsüa arudang totzü nung excise duty agiba ajanga Centre-i sen lakh crore 11 bendenogo aser iba sen ya nübortem ket nungi sorkari agiba lir ta Congress-isa ashir. Ano, Left party temi ‘Centre sorkari ozüng alema bendenba sen meyipa bener arutsü aser mapa adokdaktsütsü ta nangzükbabo meinyaktet saka linük nung rongsenkettsüng khuret tulu ang ka bentsür aruogo’ ta metetdakja liasü. Nagaland nunga Nagaland Pradesh Congress Committee (NPCC)-i Hombarnep 9:00 ako nungi nikongtsütsü 3:00 ako tashi mokdangtsü sentong ayongzük aser parnoki iba sentong nung temulungertemi dang shilem agitsü atema metetdaktsü. Dimapur nung iba sentong ayonga agi aser tesem aika nung dokantem melapoki shibangba nguogo, saka ano dokan karbo lapok. Ano, auto rickshaw-i anir taxi garitem akhi ama senzüogo. Shitakba agibo iba amai nübortem ajangzüktsü asoshi aser nübortemi khuret ajuruba atema ola adoka lungkak aitdangbo, political party mesüra shinga tejak mereprangi nübortemi shilem agitsüla sernung, nisung aikati ibaji mangateter ama bilemer. Totzü nung jenjang atuba ajanga khuret aika bentsür arur aser iba ajanga takar-a süang, sensaker-a süang ajak nem tetsükdaktsü aser timtem agütsür. Tang linük nung anogoshia totzü litre nung poisa ishishi atur aser asenoki khen bilemtsü agibo, ‘poisa ishika atuba ajanga takoksa kecha balaka mangutsü’ Saka asangsang nungbo anogoshia totzü nung poisa ishika atuba ajanga hopta ka nungbo senpak 1 dak tali atur asütsü, aser ibaji ajanga kechisarena ajak nung sen teimba teimba ajungkettsüsa akümer, aser khuret tulubaji ibaji lir. Shitakba agibo totzü nung jenjang atuba aser kechisarena nung jenjang atuba anema Nagaland Voluntary Consumers Organisation (NVCO) ama teloki anir district shia nung Consumers teloktemi ola adoktsüba sernung, tanü tashi ola madoker. Nagaland nung Consumers teloktem ya tenüng atema dang tenteta ayuba ama repranger, kechiyong parnoki mapang shitak nung teinyaktsü mapa meinyaker ama ajiteter. Tanü linük nung totzü jenjang tujen atuba atema nübortem nemnemtepba ola angashia Congress-i iba atema ola adoka sentong agidangji, NVCO ama teloktemia pusema nungit asübo sentong kanga takok ngua agila, aser shibai metet Centre sorkaria atsüanem kaa totzü dak sendakba onük reprangshimla, saka tia maka iba onük ya Congress-i anir opposition telok kar aser Centre sorkar tsüngda o atsütepba ama ka ang kümdaktsü nungji, totzü jenjang ya sangküm general elections matong tashi ka tujen atutsü südi ta shisabulua bilemer.