Angh-i Greenwood school kaketshir nem tenüngsang agutsü

Kohima, Rongjui/September 14, 2018: Tanü Raj Bhavan, Kohima nung state Angh, PB  Acharya-i Greenwood Higher Secondary School, Dimapur nungi kaketshir pezü- Jason Whuorie, Kekhriezhazo Rino, Limatemjen N Jamir aser Keneikhriezo Sanchu, school Principal, Uttam Basak aser Teacher Guide, Sukumar Pradhan nunger den tangokba noksa nung angur.

Kohima, Rongjui/September 14 (TYO): Tanü Nagaland Angh, PB Acharya-i Greenwood Higher Secondary School, Dimapur nungi Jason Whuorie, Kekhriezhazo Rino, Limatemjen N Jamir aser Keneikhriezo Sanchu nungeri School Science Exhibition mapang genset-powered gari ka yanglutetba atema tenüngsang agutsüogo, ta PRO to Governor sangdong ka ajanga metetdaktsü.
School Principal, Uttam Basak aser iba project nung Teacher Guide, Sukumar Pradhan na leniba nung kaketshir pezüi Raj Bhavan, Kohima nung Angh ajurua liasü.
Iba mapang nung Angh-i kaketshirtem dak metetnüba shisatsü aliba aser parnok sempet atema tenüngsang agüja, joko tangbo nenok “Skill India” nung shilem agirtem lir, ta ashi.
Angh, Acharya-i, Science Exhibitions ajanga kaketshirtem dak mim sempet aliba jangjar aser science, technology aser engineering awareness alir; item ama exhibition ajanga shilem agirtemi scientific shisatsü angur, ta ashi.
Anghisa parnok dang shisaliok bushiba mapang nung ano maneni meranga inyaktsü aser tarutsü nung state renlokba nung parnok shisatsü amshitsü atema renema alitsüla, ta ashi.
Paisa kaketshirtem dang sorkar indang schemes aser programmes balala metetdakja item nungjagi tajangzük agitsü ajungshiogo.
Acharya-isa Greenwood Higher Secondary School, Dimapur nung Principal aser tesayurtemi kaketshirtem ajungmesoba atema parnok nem tenüngsang agutsü.
Nija aser lokti nung terenlok alitsü atema item ama sentongtem ayongzüka agitsüla, ta paisa ashi.
Tarutsü nunga school-i maneni item ama kaketshirtem ajungmesotsü aser tasen purapitetba ajanga India, talisa Nagaland tashi itdaktsütsü imlar, ta Angh-i ajungshi.
Iba dak alia Acharya-i Greenwood Higher Secondary School nung awards balala agutsütsü atema sen lakh 1 tenla agutsüogo.