Kensep ka adokba sülen ‘The Cranberries’ telok anizüngzüktsü

Rongjui/September 14, 2018: Kenatener telok ‘The Cranberries’-i tatembangsüa kensep ka adokba sülen anisüngzüktsü/anentsü; kensep tasenba nung taoba mapang iba telok nungi kentener, Dolores O Riordan-ia shilem agia lir.
‘Linger’ ken atener telok nung züngsem- Fergal Lawler aser Noel Hogan nati 2017 küm s ‘Something Else’ kensep adokba sülen kensep tasenba atema aken record süogo, ta metetdaktsü.
Taküm Aenjeti/January 15 nü arishi küm 46, Dolores tzü nung arakseta liasü, aser ibaji la yi agi meseper aliba ajanga liasü ta bushitet. The Cranberries-i studio kensep 8buba nüngja ano memeter mesüra koba ano nung sayatsüar mejangja.
The Guardian osangkaket den interview ka agidang lead guitarist aser kenzülur, Noel-i, “Iba kensep tasenba nung kenjangtemji kanga junger. Lai teti agia, la pelaa aliba mapang nung ken zülutsü kanga tasak ta jembia liasü. Lai ashiba agi, taküm nung tejashi aliba mapang nungang ken kanga junga züluteter. Onoki iba kensep sayatsü, aser ibaji tatembang asütsü,” ta paisa metetdaktsü.
Drummer, Fergal-ia Dolores shisatsü mesüngjemtetba aser timtem aliba indang jembia liasü. 2016 küm la dak ‘bipolar disorder’ puteta liasü.
Noel-i ‘Zombie’ ken atenla, Dolores tesüiba küm ishika junga liasü saka la teberem nung timtem aliba ajanga kentena shilem agidang la sadema marakzüteti timtem ajangshia liasü, ta ashi.
The Cranberries telok ya 1990s mapang nung tenteta liasü aser parnok indang mezüngbuba nüngtugu kenji ‘Linger’ liasü.
Parnok indang kensap tanabuba ‘No Need To Argue’ 1994 küm saya aser ibaji alima nung kanga nüngtugu akum. iba kensep nungji ‘Zombie’, ‘I Can’t Be With You’ aser ‘Ode To My Family’ ken densema lir.
Iba sülen parnokisa kensep pongu adok, aser item rongnung yaküm sayaba ‘Something Else’ kensep densema lir.