Mizoram home minister Lalzirliana-i menden toktsü

Aizawl, Rongjui (September) 14 (Agencies): Hokolbarnü Mizoram nung home minister R Lalzirliana-i menden nungi anenba ajanga Congress sorkar atema tebilemtsü tulu ka bentsür aruogo.
Lalzirliana ya Mizoram PCC nunga tatong tir inyaker aser chief minister den tesentaktep majung lir.
Pai party anema jembiba atema party disciplinary committee-i show cause notice ka agüja liasü. Aizawl nung osangkakettem ajanga ashiba agi opposition party-i Congress tatong tir Lalzirliana den ajurutepogo aser taruba election nung parnok indang party ticket amer tokteptsü asüngdangogo.
R Lalzirliana-i chief minister Lal Thanhawla dangi züluba shidi nung “Congress sorkari Saitual nem full-fledged district magütsüba atema pai home minister menden toktsür” ta shia lir.
Congress sorkar kümtetba sülen chief minister-i par constituency Tawi kübok aliba Saitual tesem nem district balaka agütsütsü ta nangzük saka iba amaji meinyak, ta Lalzirliana-isa metetdaktsü.
“Saitual nung alirtemi aiben nü dang nangzükba ama inyaktsü shia takhangba agütsüogo. Sorkari nangzüka ama meinyakba agi ni iba cabinet menden nung amentsü asoshi tip metemi bilemer. Aji agi ni iba cabinet menden nungi anener” ta Lalzirliana-isa shidi nung shia lir.
Home minister-isa Congress Bhavan nung o tatsü ka jembiba sülen chief minister indang office-i oa shidiji agütsü.
Chief Minister Lal Thanhawla tanü anüngdang Chamnmari Hall lapoktsütsü atema apusoa ao aser pai Lalzirliana dak sendakba olen kecha memetetdaktsüi lir.
Mizoram nung yimtenren asadangertemi ashiba agi home minister-i shidi nung ashibaji kuli tila ka dang lir aser onük tuluba lir.
“Home minister-i telemtetba agibaji mepaitoktetba tebilemtsü kar ajanga lir” ta Lalzirliana den tesentaktep tajung alir kati ashi.
Mizoram PCC nung Disciplinary Committee-i anogo ana tejakdang home minister nem show cause notice ka agütsüba sülen Mizoram yimtenren tensa melenshir.
Opposition party Mizoram National Front (MNF)-i home minister den ajurutepba sülen party anema mapa inyakba putetba agi show cause notice ji agütsü, ta committee-i ashi.
“Pa Congress party nung züngsem ka süaka osangkaket kati pa MNF party den olemtepdar ta osang sangdong” ta disciplinary committee-isa metetdaktsü.
Ajisüaka, home minister Lalzirliana-i züluba shidi nung pai cabinet minister menden nungi dang anen ashi Congress party nungbo züngsem ka asütsü ta shia lir.