Sushma aser Russia Deputy PM nati linük tesendaktep reprangshi

Rongjui/September 14, 2018 nü Russia yimtiba, Moscow nung External Affairs Minister, Sushma Swaraj-i Russia Deputy Prime Minister, Yury Borisov ajurua senden amenba noksa nung angur.

Moscow/New Delhi, Rongjui/September 14 (Agencies): Tanü Russia yimtiba, Moscow nung Russia Foreign Minister, Sergei Lavrov-i India Foreign Minister, Sushma Swaraj ajurua liasü.
External Affairs Minister Sushma Swaraj aser Russia Deputy Prime Minister, Yuri Borisov nati tanü linük ana tsüngda shishilembaba aser investment, science & technology, sobaliba aser tanga onük balala nung amalitepa inyakba maparen reprangshiogo.
Lenir ana leniba nung 23buba India-Russia Inter-Governmental Commission on Technical & Economic Cooperation (IRIGC-TEC) senden amen.
“Sector ajak nung asen tesendaktep ulushitsü aser tanga maongka balala jangjatsü atema senden tenzükogo! EAM @SushmaSwaraj aser Russia Deputy Prime Minister Yuri Borisov na leniba nung India-Russia Inter Governmental Commission on Trade, Economic, Scientific, Technological & Cultural Cooperation senden tenzükogo,” ta tanü External Affairs Ministry otongdar, Raveesh Kumar-i twitter ajanga metetdaktsü.
IRIGC-TEC senden ya küm shia ayonga amener aser iba senden nung linük ana tsüngda amalitepa inyakba onük balala reprangshir.
Commission-i item onük reprangshiba sülen mapatong balala inyaktsü atema onüktem benoktsü, ta Ministry of External Affairs-i sangdong ka nung metetdaktsü.
Iba committee tesüsabuba senden 2017 küm Luchii/December ita nung New Delhi nung mena liasü.
Taküm Chiteni/May ita nung Ato kilonser, Narendra Modi aser Russia Tir, Vladimir Putin na Sochi yimti nung ajurua senden amendang India-Russia tesendaktep ajungkettsü atema jembia liasü. Iba sülen Aami/June ita nunga Juohannesburg yimti nung BRICS Summit alidang tena ajurutepa jurila senden ka menogo.