Mapa nung tenendak, mesüra senzüka doktsüba tsüta langkabosa lir

– S. PANGER

Tanü putu nung lokti tentet balala aika lir, item Reju ajak nung Govt, private etc, lir. Tentet balala ajak nung inyaktsü lokti ajak nung temaba tashi jagi inyaker shimteter. Mapa lemzüka akar teküpok nungi temaba nisung tashi taküm nung mapa teinyaktsü mapang telemtet nungji ochishia pei mapa nung mapang shitak amshia nendaka inyakertem aser taküm merükteta alirtem yamai ataloktsü, ataloka arudar: –
* Arishi küm 100 abensaa aser talila alir,
* Pei mapa kümsük abensa alir aser pension agir,
* Pei mapa kümsük dak alaka, pension/taa agia alir,
* Nüburtem tenzükba jagi asen Kibuba Yisui kanga pelar,
* Tilaba nungi tuluba tashi political ajanga award mangütsüaka nisung tang junga tenzükbaji Tsüngremi meteta lir, Pai temolung chia lira na asoshi teperi, temoatsüji na asoshi lir.
Tangar kin nisung indang memetet, asen Aor paper Tir yimyim nung züngshiba agi molung shiranga bilemtsür.
* Arishi küm tatsü nung lennir aika süa adoker,
* Osang kaket nung madokyonga Officers aika asür,
* Reju balala nung Govt. mapa inyakertem kümsük matongdang arishi atemer.
* CTN Town pensioner unit kisüng nung pensioner 226 lir, yangji amitsür 50 percent lir, aji koda?
* Tsüngremi nisungji Pai yangluba lima nung taso langa jangratema alitsü yanglu, saka Pa o manga, tashi mangaba agi yakta tesama angur, ya pei sasa dak aket, taküm aliri o ya angadi, agizükdi, na junga alitsü. Lame excuse ta pi ashiba o ya Tsüngremi magizüker.
Sayu 12:14 yangi ashi amah, tajung saüka tamajung süaka miima aliba ajak Tsüngremi o bendangtsü, nisung tenükdang Tsüngremi ne mapa nung shitak lira aji teperi, Pai junger ta bilemdaktsütsüsa nisung shia lidi.