RSS-i nungita nashi scü aser nashi natzü agi yangluba osettem ayoktsü

New Delhi, Rongjui/September 19 (Agencies): Rashtriya Swayamsevak Sangh (RSS)-i nungitba pharmacy kati Mongputeni/October ita nungi tenzüka nashi scü aser natzü agi yangluba cosmetics aser mozü products aika Amazon nung ayoktsü, ta osang ka ajanga metetdaktsü.
Osang angazükba agi, Mathura nung RSS-i achaayangba centre, Deen Dayal Dham-i ‘therapeutic’ products 30 shi ayoktsü, aser itemji timbaka nashi scü aser nashi natzü agi yangluba lir.
Iba centre nung Deputy Secretary, Manish Gupta-i, “Onoki centre nung nashi natzü aser nashi scü bendener, aser sapon den tanga skin products aika nung ibaji tongti süa amshir,” ta metetdaktsü.
Kasa osang ajanga ashiba agi, iba centre nung tailoring unit-i Modi aser Yogi kurtas-a yanglua ayoktsü.
RSS otongdar, Arun Kumar-i, item products online ajanga ayokba nükjidongji nüburtem nem mapa agutsütsü aser parnok rongsenkettsüng jenjang ajungkettsütsü atema lir, ta metetdaktsü.
Deen Dayal Dham indang products ji sen 10 nungi sen 230 tsüngda jenjang osettem lir. Ano Modi aser Yogi kurta ji ka nung sen 220 agi ayoktsü. Yogi kurtas ji ‘saffron’ sentsü dang angutsü ajisüaka Modi kurtas jibo sentsü balala nung angutsü aser Yogi kurta den talangba asütsü.
Iba centre nung kurtas dak alia jackets, pyjamas aser tola temesünga yanglur, aser yangji inyakertem nisung 50 shi dang lir aser anogo ka taa sen 50 agutsür.
Nashi natzü aser scü agi products balala yanglubaji Dham kija masü saka Baba Ramdev indang Patanjali Ayurved nunga Godhan Ark, Sanjivani Vati, Panchgavya Soap, Kayakalp Oil aser Shudhi Phenyl nung nashi natzü densema lir.