Champions League: Barcelona, Liverpool aser Inter Milan-i takok angu

Rongjui/September 19, 2018 (Agencies): Sangtennü Champions League mezüngbuba round nung Barcelona pur atema Lionel Messi-i hat-trick ka agüja Dutch champions PSV Eindhoven madak parnoki 4-0 agi takok nguogo.
Asaya nung mezüngbuba goal Messi-i free kick ka ajanga minute 32buba nung idaktsü.
PSV puri asaya kanga tashi ita tenzük aser parnoki barca pur kanga ajanga nokdangba dang masü saka attack-a kangajunga süa liasü, saka asaya tanabuba shilem nung parnok tashi ajema aküm aser iba ajanga parnoki asaya makok.
Asaya tanabuba shilem nung French forward Ousmane Dembele-i minute 75buba nung Barca pur atema tanabuba goal idaktsü aser iba sülen minute ana lir messi-i tasembuba goal idaktsü. Maneni paisa minute 87buba nung pa asoshi goal tasembuba aser par telok asoshi goal pezübuba idakja parnoki asaya ayong ayonga akok.
Asaya nung minute 79 orr alidang France nunger defender Umtiti tanabuba yellow card chia asaya nungi tugudaktsü.
Santennü asaya tanga ka nung Roberto Firmino substitute ka ama aiter mapang apuloktsür asayaba mapang nung goal ka idakja Liverpool puri goal 3-2 agi Paris Saint-Germain madak takok nguogo.
Asaya nung mezüngbuba goal Daniel Sturridge-i minute 30 buba nung idaktsü aser iba sülen minute trok lir Milner-i penalty ka ajanga Liverpool pur atema tanabuba goal idaktsü.
Ajisüaka PSG puri meyiper Thomas Meunieer ajanga minute 40 buba nung goal ka idaktsü aser iba sülen Mbappe-i minute 83buba nung goal tanabuba idakja score kasasa aküm.
Telok ana tsüngda asaya goal kasasa nung tempangtsü imlaa aliba mapang extra time nung Firmino-i Liverpool pur atema goal tasembuba idakja parnoki asaya kokogo.
Maneni kasa asayamung Group B asaya tanga ka nung Inter Milan puri 2-1 agi Tottenham Hotspur madak takok nguogo.
Asaya nung mezüngbuba goal Spurs pur atema Christian Eriksen-i minute 53buba nung idaktsü aser asaya tatemlen ka tashi telok anaprongla senteper goal ka ya dang agütsür liasü. Ajisüaka asaya tatemlen minute 85buba nung Icardi-i Inter pur atema goal ka idaktsü aser score kasasa aküm iba sülen asaya tanabuba shilem mapang apuloktsür asayaba mapang minute 90+2buba nung Matias-i Inter Milan atema tanabuba goal idakja parnoki asaya kokogo.