Mkg nung Rubella Measles vaccine campaign atema senden amen

Mokokchung, Rongjui/September 19 (TYO): Tanü ADC (Planning) Office, Mokokchung Conference hall nung Rubella Measles Vaccine Campaign atema District Task Force Committee senden menogo, ta ketdangsertem osang ka ajanga metetdaktsü.
Senden nung Mokokchung Deputy Commissioner-i züngsemtem, department balala aser lokti tentettem dang iba campaign mapang nung tanur ka danga mezüdoki vaccine agutsütsü atema kanga nendaka inyaktsü asoshi mepishia metetdaktsü.
Paisa iba campaign takok angutsü aser tanur ajak tajangzük agitettsü atema ajaki amalitepa inyaktsü ayongzük.
DC-isa züngsemtem dang iba vaccine ajanga negative side effect malitsü atema süoki ia kanga nendaka inyaktsü metetdaktsüba den külemi nüburtem nem iba campaign indang angatetdaktsütsü atema orientation programme ayonga akatsü metetdaktsü.
Kasa senden nung DPO (RCH & UIP), Mokokchung, Dr. Temsuyanger-i, PHC 6 kübok Mokokchung district ayimjemtsü aser arishi ita 9 nungi arishi küm 15 tsüngdapur tanur 27,397 ajangzüktsü, ta metetdaktsü.
Rubella Measles campaign ya Mongputeni/October 3, 2018 nungi tenzüktsü.